Atyraýda kúdiktiniń aǵasynan para alǵan polıtseıge 6 mln teńge aıyppul salyndy

ATYRAÝ. KAZINFORM – Atyraýda polıtsııa qyzmetkeri qylmystyq isin toqtatý úshin kúdiktiniń aǵasynan para alǵan. Sot úkimimen polıtseıge 6 mln teńge aıyppul salyndy. 

Atyraý qalasyndaǵy №2 sotta qyzmet babyn paıdalanyp, alaıaqtyq jasaǵany úshin aıyptalǵan polıtsııa qyzmetkerine qatysty qylmystyq is qaraldy. Polıtseıge QR Qylmystyq kodeksiniń 190-babynyń 3-bóliginiń 2-tarmaǵymen aıyp taǵylǵan.

– Atyraý qalalyq polıtsııa bóliminiń qyzmeteri basqa laýazymdy tulǵanyń óndirisindegi qylmystyq isti toqtatý úshin kúdiktiniń aǵasynan 300 myń teńge alǵan. Aıyptalýshynyń kinási áńgimelesý jazbalarymen, jábirlenýshi jáne kýálardyń jaýaptarymen, jasyryn tergeý áreketteriniń nátıjelerimen, sot-fonografııalyq, psıhologııalyq-fılologııalyq saraptamalardyń qorytyndylarymen dáleldendi, - dep habarlady sottyń baspasóz qyzmeti.

Prokýror sottalýshyǵa memlekettik qyzmette, memlekettik uıymdarda jáne kvazımemlekettik sektorda laýazymdardy atqarý quqyǵynan ómir boıyna, 6 jyl merzimge bas bostandyǵynan aıyrý jazasyn taǵaıyndaýdy, polıtsııa leıtenanty sheninen aıyrýdy surady. Alaıda sottalýshy men onyń advokattary aıyppen kelispeı, aqtaýdy surady.

Sottalýshynyń kámeletke tolmaǵan balalarynyń bary jaza men jaýapkershilikti jeńildetetin mán-jaı retinde, al qabyldaǵan antyn buzýy aýyrlatatyn mán-jaı retinde tanyldy. 

– Sottalýshyǵa memlekettik qyzmette, memlekettik uıymdarda jáne kvazımemlekettik sektorda laýazymdardy atqarý quqyǵynan ómir boıyna aıyrý, jymqyrylǵan múliktiń 20 eselengen mólsherinde – 6 mln teńge aıyppul salý jazasy taǵaıyndaldy. Ol polıtsııa leıtenanty sheninen aıyryldy. Jábirlenýshiniń jymqyrylǵan múliktiń qunyn óndirý týraly azamattyq talaby tolyǵymen qanaǵattandyryldy, - dep málim etti sottan.

Sot úkimi zańdy kúshine engen joq.

Eske sala ketelik, budan buryn Atyraý munaı óńdeý zaýytynyń eks-dırektoryna 6,9 mln teńge aıyppul salynǵanyn jazǵan bolatynbyz.