Atyraýda kópirlerdegi tehnıkalyq aqaýdy erte anyqtaý úshin dıagnostıka júrgiziledi
ATYRAÝ. KAZINFORM – Atyraý oblysyndaǵy joldarda 94 kópir bar. Eń kóbi ári eskisi 1970 jyldary respýblıkalyq mańyzy bar jolda salynǵan.
«Jol aktıvteri sapasynyń ulttyq ortalyǵy» RMK Atyraý oblystyq fılıalynyń dırektory Aslan Dúısenovtiń aıtýynsha, jol ústine salynǵan kópirlerdiń tehnıkalyq aqaýyn erte anyqtaý úshin dıagnostıka júrgizý kózdelip otyr.
– Jol – kólik qatynasyn retteıtin basty strategııalyq nysan. Onyń sapasyn saralap, ásirese kópirlerdegi bolýy múmkin tehnıkalyq aqaýlardy erte anyqtaýdy qolǵa alamyz. Osyǵan oraı qaýipsizdikti qamtamasyz etý, jol-kólik oqıǵalarynyń aldyn alý, kólikterdiń úzdiksiz qozǵalysyna múmkindik berý úshin kópirlerge dıagnostıka júrgiziledi, - deıdi Aslan Dúısenov.
Onyń málimetine súıensek, Atyraý oblysynyń aýmaǵyndaǵy respýblıkalyq mańyzǵa ıe joldarda 57 kópir bar. Onyń ishinde 30 kópir Atyraý qalasynan Reseı shekarasyna deıingi jol bóliginde ornalasqan. Kópirdiń eń eskisi 1970 jyldary paıdalanýǵa berilgen.
– Atalǵan joldy jóndeý jumystarynyń nátıjesinde kópirdiń bári qaıta jańǵyrtyldy. Atyraýdan Oral qalasyna deıin qatynaıtyn tas joldaǵy 19 kópir 2005 jyly kúrdeli jóndeýden ótkizildi. Al Dossor-Qulsary-Beıneý-Saı Ótes-Aqtaý jolyndaǵy 8 kópirge 2008 jyly qaıta jańǵyrtý jumystary júrgizildi, - dep málim etti Aslan Dúısenov.
Fılılal dırektorynyń deregine qaraǵanda, oblystyq mańyzy bar jolda 26, aýdandyq deńgeıdegi jolda 11 kópir bar.
– Endi dıagnostıka kezinde kópirlerdiń jol jabyndysynyń beriktigi men tegistigi, geometrııalyq jaǵdaıy tekseriledi. Іlinisý koeffıtsıenti men kólik aǵynynyń qarqyny, joldaǵy syzattar anyqtalady. Kópir sapasyna taldaý jasaý, jóndeý jumystaryn ýaqytyly uıymdastyrý, kútip ustaý, jóndeýmen aınalysatyn kásiporyndardy qarjylandyrý, jol qurylysynyń jaı-kúıi baǵalanady. Mundaı dıagnostıka kópirlerdiń tozyǵy jetken elementterin der kezinde aýystyrýǵa múmkindik beredi, - deıdi Aslan Dúısenov.
Eske sala ketelik, budan buryn «Muqyr-Qulsary» jolyn jóndeýge tsıfrlyq teńge paıdalanylatynyn jazǵan edik.