Atyraýda kópirden Jaıyqqa sekirýge oqtalǵan BQO turǵyny qutqaryldy

Atyraýda er adam Jaıyq ózeniniń ústinen salynǵan kópirden sekirýge oqtaldy. Onyń BQO turǵyny ekeni anyqtaldy, dep habarlaıdy Kazinform.

Oblystyq polıtsııa departamenti baspasóz qyzmetiniń málimetinshe, oqıǵa keshe, 12 qarashada tirkelgen.

«Jergilikti ýaqytpen saǵat 17:52 shamasynda Atyraý qalalyq polıtsııa basqarmasyna qarasty jedel basqarý ortalyǵynyń qyzmetkerleri kópirden sekirgeli turǵan er adamdy baıqaǵan. Bul týraly patrýldik polıtsııa qyzmetkerlerine habarlap, kópirdiń qaı kóshede ornalasqany týraly baǵyttama bergen. Oqıǵa ornyna patrýldik polıtsııa batalonynyń qyzmetkerleri Danabek Saqýov pen Bolatbek Ázimov 3 mınýtta jetken. Tártip saqshylary oqıǵaǵa beıjaı qaramaǵan turǵyndardyń kómegimen er adamdy qutqaryp qaldy, -dep habarlady departamenttiń baspasóz qyzmeti.

Kópirden sekirýge oqtalǵan er adamnyń Batys Qazaqstan oblysynyń turǵyny ekeni anyqtaldy. Onyń jasy – 30-da. Qazir er adamnyń kópirden sekirýge oqtalý sebebi anyqtalyp jatyr.
Eske sala ketelik, buǵan deıin Atyraý oblysy ákiminiń orynbasary kóbinde aýqatty, tolyq otbasynan shyqqan balalar ózine qol jumsaýǵa beıim ekenin aıtqan edi.

Oblys ákiminiń orynbasary Jasqlan Bısembıevtiń aıtýynsha, bıyl 38 bala ózine qol jumsamaq bolǵan. Ókinishke qaraı, 9 jasóspirimge jaqyndary tarapynan der kezinde kómek berilmegen.

Jaqynda ata-anasyna renjigen 14 jasar qyz ben 15 jasar ul bıikten sekirip ketti. Biri kópqabatty úıden, ekinshisi kópirden qulaǵan.

– Taldaý kórsetkendeı, kóz jumǵan balalardyń basym kópshiligi — tolyq ári aýqatty otbasynan. Alaıda júrgizilgen zertteýlerge sáıkes, mundaı áreketke ata-anasymen, keıde dostarymen kelispeı qalǵan balalar beıim eken. Sondyqtan, ata-analar balasymen meıilinshe ashyq sóıleskeni jón. Olarmen kóbirek ýaqyt ótkizip, syrlasyna aınalýy kerek, -dep málim etti Jasulan Bısembıev.

Sondaı-aq, Atyraýda 15-qabattyń balkonynan sekirýge oqtalǵan áıel qutqarylǵanyn habarlaǵan bolatynbyz.