Atyraýda kópqabatty 7 úıdiń qurylysy 3 jyldan beri toqtap tur
ATYRAÝ. KAZINFORM — Atyraý qalasynda 4 jyl buryn bastalǵan kópqabatty 9 úıdiń qurylysy aıaqsyz qaldy.
Talqaırań aýylyndaǵy 9 qabatty 7 turǵyn úı qurylysy 3 jyldan beri toqtap tur. Buǵan merdiger mekeme jumysynyń óndiristik kesteden qalýy sebep.
Jalpy bul jobanyń máselesi tereńde jatyr. 2023 jyldyń sońynda paıdalanýǵa berilýi tıis baspanalardy salýǵa jaýapty bolǵan «Tarazqurylysınvest» kompanııasy ózge óńirde tirkelgendikten, mundaǵy jumysty sýbmerdigerlerge bólip bergen. 2023 jyly materıaldardyń qymbattaǵanyn syltaýratyp, jobany qaıta qaraýdy suraǵan. Alaıda basshylar merdigerdiń bul ótinishin qaraýǵa negiz joq dep tapty.
Keıin ákimdik tarapynan jasaqtalǵan kelisimshartty buzý, avanstyq tólemdi bıýdjetke qaıtarý boıynsha sotqa talap-aryz joldanyp, 2024 jyldyń qańtar aıynda qanaǵattandyryldy. Sot sheshimimen kelispegen merdiger mekeme appelıatsııalyq shaǵym jazǵan.
— Birinshi satydaǵy sheshim kúshinde qaldyryldy. Qazirgi ýaqytta avanstyq tólem qaıtarylýda. Jobalyq-smetalyq qujat boıynsha qalǵan jumystardyń qunyn eseptep, tenderdi qaıta ótkizý josparlanyp otyr. Bul jumysty júrgizý úshin bıýdjettik komıssııadan sheshim kútip otyrmyz, — dep málimdedi qalalyq qurylys bólimi.
Ákimdiktiń bergen resmı aqparatyna súıensek, josparlanǵan qurylystyń tek 10 paıyzy istelgen. ıAǵnı, irgetasy ǵana quıylǵan.
Bul ýchaskedegi qurylystyń qashan jandanatyny belgisiz. Óıtkeni, smetalyq qujatty ózgertýge kerekti qarjy áli bólinbedi.
Sońǵy málimet boıynsha Atyraý qalasynda 30 myńnan asa adam turǵyn úı kezeginde tur.
Aıta keteıik, dál osy qurylystyń janynda salynyp jatqan 24 úıdiń qurylysy 7 jylǵa sozylyp ketti. 2019 jyly bastalǵan jumys 2020 jyly tapsyrylý kerek edi. Alaıda áli kúnge halyq ıgiligine berilgen joq.
