Atyraýda kópqabatty 45 úıdi jóndeýge jáne 67 lıftini aýystyrýǵa 3,7 mlrd teńge qajet
ATYRAÝ.KAZINFORM — Atyraýda lıft qulaǵan turǵyn úı kesheninde jalpy 7 jedelsatynyń ornyna jańasy kerek. Bul jumysqa 122 mıllıon teńgeden asa qarjy qajet. Qulap tústen jedelsaty buǵan deıin 2014 jyly aýystyrylǵan.
«Grand Atyraý» turǵyn úı kesheninde bolǵan jaǵdaıdan keıin atyraýlyqtar birqatar úıdegi jedelsatyny aýystyrý kerektigi týraly pikir bildirip jatyr. Ásirese kópshilikti Almagúl, Bereke, Nursaıa, Saryarqa yqshamaýdandarynan bólek Berqaıyr Amanshına, Baqtygereı Qulmanov, Bınesh Jarbosynov, Qanysh Sátbaev kóshesindegi kópqabatty úılerdegi lıfttiń jaǵdaıy alańdatady.
— Bir lıftiniń quny 20 mln teńgeden asady. Bul qarjyny bir podezdegi birneshe páterge bólsek, júzdegen myń teńgeden keledi. Barlyǵynyń birdeı qomaqty aqshany sanap berýge jaǵdaıy jetpeıdi. Sondyqtan burynǵydaı aı saıyn bólip turýǵa múmkindik jasalyp, jańasyna aýystyrylsa degen usynys bar. Óıtkeni, paıdalanylǵanyna 20 jylǵa jýyq ýaqyt bolǵan jedelsatylar adam ómirine qaýipti. Qaıǵyly oqıǵanyń aldyn alý kerek dep esepteımiz, - dep pikir bildirdi Almagúl yqshamaýdanynyń turǵyndary.
«Turǵyn úı qatynastary týraly» zańǵa sáıkes, kópqabatty turǵyn úıdegi jedelsaty ortaq múlik bolyp sanalady. Sondyqtan ony kútip-ustaý — sol turǵyn úıdegi menshik ıeleriniń ortaq mindeti.
— Jedelsatyǵa tehnıkalyq qyzmet kórsetetin uıymdy turǵyndardyń ózderi tańdaýǵa quqyǵy bar. Tıisti qyzmet kórsetýshi uıymmen kelisimshartty da turǵyn úıdiń menshik ıeleri jasaıdy. Qala ákimdigi jedelsatyǵa tehnıkalyq qyzmet kórsetetin uıym retinde bul mindetti tikeleı atqarmaıdy, — dep habarlady qalalyq ákimdik.
Qazirgi ýaqytta turǵyndardyń ótinishteri negizinde aýystyrýdy qajet etetin 67 jedelsaty anyqtalǵan. Olar Almagúl, Avangard-2 yqshamaýdanynda, Qulmanov, Kantseva, Satbaev, Taımanov, Jarbosynova, Amanshına, M.Mametova, R.Gabdıev, Aqjarma kóshelerindegi úılerde ornalasqan.
Bul másele Atyraýda jyl basynda da kóterilgen edi. Sol kezde aımaq basshysynyń orynbasary orynbasary Qaırat Nurtaev respýblıkalyq bıýdjetten qarjy bólinbegen jaǵdaıda qarjy jergilikti bıýdjetten qaralyp, jedelsatylar aýystyrylatynyn aıtqan edi. Óıtkeni, 2025 jyly jedelsatylardy aýystyrý jáne úılerdi jańǵyrtý jumysyna qajetti qarjy respbýlıkalyq bıýdjetten bólinbeı qaldy.
Ázirge oblys bıýdjetinen atalǵan máseleni sheshýge qarjy qarastyrylmaǵan. Bólinbeıtin de syndy. Óıtkeni, oblys ákimdigi qoldanystaǵy bıýdjet zańnamasyna súıenip, jergilikti atqarýshy organ memlekettik mekemeniń teńgerimindegi kóppáterli turǵyn úılerdi kútip-ustaýǵa, lıftilerin aýystyrýǵa jáne kúrdeli jóndeýge jergilikti bıýdjetten qarjy bóle almaıtynyn málimdedi.
— Bul máselelerdi sheshý úshin turǵyn úı qoryn jańǵyrtýdyń memlekettik baǵdarlamasy aıasynda kúrdeli jóndeý júrgizý jáne lıftilerdi aýystyrý tetigi qarastyrylǵan. Jumysty qarjylandyrý qaıtarymdy negizde júzege asyrylady. Atalǵan sharalarǵa qarajat tıisti memlekettik baǵdarlamalar aıasynda bólinedi, al jergilikti bıýdjetten qaıtarymsyz qarjy berý kózdelmegen. Sonymen qatar, 2026–2027 jyldarǵa arnalǵan respýblıkalyq bıýdjetti qalyptastyrý kezinde Qazaqstan Respýblıkasy Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetine jalpy somasy 3,738 mlrd teńgeni quraıtyn 112 jobaǵa qarjy bólý týraly bıýdjettik ótinim joldanǵan. Onyń ishinde 45 kóppáterli turǵyn úıdi jóndeý jáne 67 lıftini aýystyrý jobasy bar, — dep habarlady oblys ákimdiginiń baspasóz qyzmeti.
Búginde bul taqyryp ashyq kúıinde tur. Sebebi, áli kúnge respýblıkalyq bıýdjetten de qarjy qaralmaı otyr.
Aıta keteıik, el boıynsha turǵyn úı qorynda 37 918 lıft bar. Onyń ishinde 25 jyldan astam ýaqyt paıdalanylyp kele jatqan 3 797 lıft tirkeldi, al tehnıkalyq qyzmet kórsetý aıasynda 1 924 jedelsaty kúrdeli jóndeýdi qajet etedi, sondaı-aq 922 lıft apatty jaǵdaıda tur.
