Atyraýda Kongo-Qyrym qyzbasy tirkeldi: bir naýqastyń dıagnozy rastaldy
ATYRAÝ. KAZINFORM — Atyraý oblysynda bir otbasynan eki adam Kongo-Qyrym gemorragııalyq qyzbasyna baılanysty ınfektsııalyq aýrýhanada em alyp jatyr. Bul týraly Atyraý oblysy ákimdiginiń baspasóz qyzmeti habarlady.
Oblys ákimdiginiń málimetinshe, Isataı aýdanynyń turǵyny 12 tamyzda aýrý belgilerimen Atyraý oblystyq ınfektsııalyq aýrýhanasyna jatqyzylǵan. PTR zertteýi onyń Kongo-Qyrym gemorragııalyq qyzbasyna shaldyqqanyn rastaǵan. Qazir naýqastyń jaǵdaıy ortasha, turaqty. Dınamıkasy oń. Emdeý respýblıkalyq mamandardyń baqylaýymen júrgizilip jatyr.
Otbasynyń ekinshi múshesi 16 tamyzda medıtsınalyq mekemege jetkizilgen. Onyń jaǵdaıy turaqty, oń dınamıka baıqalady. Qajetti tekserýler júrgizilip, profılaktıkalyq em qabyldap jatyr. PTR testiniń nátıjesi teris bolǵan. Ákimdik baspasóz qyzmetiniń málimetinshe, eki naýqasqa da klınıkalyq hattamalar men beıindi mamandardyń usynymdaryna sáıkes medıtsınalyq kómek tolyq kólemde kórsetilip jatyr.
— Naýqastarmen baılanysta bolǵan adamdar esepke alynyp, medıtsınalyq baqylaýda. Qazirgi ýaqytta olardyń eshqaısysynda aýrý belgileri tirkelmedi. Aýrý anyqtalǵan aýmaqta aýyl sharýashylyǵy jáne úı janýarlarynan, sondaı-aq kenelerden synama alyndy. Zerthanalyq zertteýlerdiń nátıjesi teris bolyp shyqty, — dep habarlady oblys ákimdiginiń baspasóz qyzmeti.
Kongo-Qyrym gemorragııalyq qyzbasy — asa qaýipti tabıǵı oshaqtyq vırýstyq ınfektsııalardyń biri. Aýrýdyń negizgi tasymaldaýshysy — ıksod keneleri.
Kongo-Qyrym gemorragııalyq qyzbasynyń taralýyna jol bermeý maqsatynda obaǵa qarsy stantsııa, veterınarııalyq qyzmet jáne jergilikti atqarýshy organ birlesip keshendi profılaktıkalyq sharalar júrgizgen. Onyń ishinde kenege qarsy óńdeý jáne dezınfektsııa jumystary uıymdastyrylǵan.
Ákimdik baspasóz qyzmeti turǵyndarǵa keneden qorǵaný sharalaryn qatań saqtaýǵa shaqyrdy.
— Tabıǵı aýmaqtarǵa, jaıylymdarǵa, egistikke jáne mal qoralaryna barǵan kezde uzyn jeńdi, ashyq tústi kıim kıip, shalbardy shulyqtyń ishine salý qajet. Ashyq dene bólikteri men kıimdi óńdeý úshin ruqsat etilgen repellentterdi qoldaný usynylady. Tabıǵattan nemese mal sharýashylyǵy nysandarynan kelgennen keıin deneni, kıimdi jáne úı janýarlaryn muqııat teksergen jón. Deneńizge jabysqan keneni óz betińizshe alýǵa bolmaıdy. Mundaı jaǵdaıda dereý medıtsınalyq mekemege júginý qajet, — dep habarlady oblys ákimdiginiń baspasóz qyzmeti.
Kongo-Qyrym gemorragııalyq qyzbasynyń belgilerine dene qyzýynyń kóterilýi, bas aýrýy, bulshyqet aýyrýy, júrek aıný jáne qan ketý jatady. Osyndaı belgiler baıqalǵan jaǵdaıda ózdiginen em qabyldamaı, dereý dárigerge qaralý qajet. Medıtsınalyq qyzmetkerge kene shaqqanyn, aýyl sharýashylyǵy janýarlarymen nemese aýrý adammen baılanys bolǵanyn mindetti túrde habarlaý kerek.
Buǵan deıin jyl basynan beri Qazaqstanda Kongo-Qyrym gemorragııalyq qyzbasynyń zerthanalyq jolmen rastalǵan 22 jaǵdaıy tirkelgenin jazǵan edik.
