Atyraýda qonaqúıden órt shyǵyp, 13 adam evakýatsııalandy

ASTANA. KAZINFORM – Atyraýda qonaqúıden órt shyǵyp, 13 adam qaýipsiz jerge kóshirildi, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń habarlaýynsha, Atyraý qalasynyń órt sóndirý qyzmetine Altaı kóshesindegi qonaqúı keshenderiniń birinen tútin shyqqany týraly habarlama túsken.

Oqıǵa ornyna kelgen qutqarýshylar tórt qabatty qonaqúıdiń saýnasynyń birinshi qabatyndaǵy bý bólmesiniń órtengenin anyqtady.

Órt kezinde qutqarýshylar 13 adamdy evakýatsııalady. Sondaı-aq 2 adam qutqarylyp, jedel medıtsınalyq járdem brıgadasyna tapsyryldy. TJM kúshimen órt tolyqtaı sóndirildi.

- Órttiń sebebi anyqtalýda, -delingen habarlamada.

Osyǵan deıin Qaraǵandyda órtengen úıden 33 adam evakýatsııalanǵany týraly jazdyq.