Atyraýda qonaqúıde adam tonaǵan kúdiktiler ustaldy
ATYRAÝ. KAZINFORM – Atyraýda qonaqúı klıentiniń baǵaly altyn júzigi men 1,2 mln teńgesin tonaǵan 2 kúdikti ustaldy. Taǵy bir kúdikti eki adamnyń mobıldi telefondaryn jymqyrǵan.
Atyraý oblystyq polıtsııa departamentiniń baspasóz qyzmetinen málim etkendeı, tártip saqshylary 2 tonaý qylmysyna qatysty kúdiktilerdi ustaǵan.
«Uıymdasqan qylmysqa qarsy is-qımyl basqarmasynyń qyzmetkerleri 2 tonaý qylmysyna baılanysty jedel izdestirý is-sharasyna ótkizdi. Qylmystyń biri Atyraýdaǵy qonaqúıde bolǵan. Qonaqúıde 23 jáne 18 jastaǵy kúdiktiler 39 jastaǵy tutynýshyǵa kúsh qoldanǵan. Sóıtip, jábirlenýshiniń baǵaly altyn júzigi men qolsaǵatyn, 1 mln 200 myń teńge aqshasyn tonaǵany anyqtaldy. Kúdiktiler anyqtalyp ustaldy», - dep habarlady departamenttiń baspasóz qyzmeti.
Sondaı-aq, atalǵan basqarmanyń qyzmetkerleri 45 jáne 42 jastaǵy turǵyndardyń moblıdi telefonyn jymqyrǵan kúdiktini ustady. Kúdiktiniń jasy – 36-da.
Qazir kúdiktilerge qatysty tonaý deregimen tergeý amaldary júrgizilip jatyr. QR Qylmystyq kodekste tonaý qylmysy úshin kúdiktilerge 3 jyldan 7 jyl merzimge bas bostandyǵynan aıyrý jazasy kózdelgen.
Eske sala ketelik, buǵan deıin Atyraýda birneshe turǵynnyń atyna 7 mln teńge nesıe rásimdegen kúdikti ustalǵan edi.
