Atyraýda kompanııa lastanǵan topyraq úshin 334 mln teńge aıyppul salyndy
ASTANA. KAZINFORM — Atyraý oblysynyń ekologııa departamenti «Magıstraldy sý qubyry» JShS-ne lastanǵan topyraq qaldyqtarynyń jınalýyna belgilengen lımıtterdi buzǵany úshin 334,1 mıllıon teńge ákimshilik aıyppul saldy.
Departament tekserý barysynda anyqtalǵan zań buzýshylyqtarǵa baılanysty Qazaqstan Respýblıkasynyń Ákimshilik quqyq buzýshylyq týraly kodeksine sáıkes ákimshilik is qozǵap, tıisti hattama toltyrǵan.
Kompanııa ekologııa departamentiniń qabyldaǵan sharalaryna sot arqyly shaǵymdanǵan. Alaıda Atyraý qalasynyń ákimshilik quqyq buzýshylyq jónindegi mamandandyrylǵan soty shaǵymdy qanaǵattandyrmady.
Keıin kompanııanyń shaǵymyn Atyraý oblystyq sotynyń qylmystyq ister jónindegi alqasy da qarady. Apellıatsııalyq ınstantsııa sot sheshimin ózgerissiz qaldyryp, kompanııanyń talabyn qanaǵattandyrmady.
Osylaısha, sot sheshimderimen «Magıstraldy sý qubyry» JShS-niń ákimshilik quqyq buzýshylyq jasaǵany rastaldy.
Qazirgi ýaqytta 334,1 mıllıon teńge kólemindegi aıyppul tolyq óndirilip, memlekettik bıýdjetke aýdaryldy.
Eske salaıyq, buǵan deıin Atyraý munaı óńdeý zaýytynda ekologııalyq zań buzý anyqtalǵanyn habarlaǵan edik.
Al Atyraý munaı óńdeý zaýyty tekseris nátıjesimen kelispeıtinin málimdedi.
