Atyraýda kompanııa dırektory 25 adamǵa jalǵan kelisimmen 313 mln teńgeniń páterlerin satqan

ATYRAÝ. KAZINFORM – Atyraýda qurylys kompanııasynyń dırektory 25 adammen  aldyn ala jalǵan kelisimshart jasaǵan. Sóıtip olarǵa quny 313 mln teńgege baǵalanǵan páterlerin  satqan.  

Atyraý oblystyq prokýratýranyń málimetinshe, birneshe qurylys kompanııasynyń osyndaı zańsyz áreketi anyqtalǵan.

«Atyraýda «Andora Konstrakshn» JShS-niń dırektory 2020-2023 jyldar aralyǵynda jergilikti atqarýshy organnan úleskerlerdiń aqshasyn tartýǵa kelisim almaǵan. Biraq, 25 azamatqa jalǵan aldyn-ala kelisimder jasaý arqyly 313 mıllıon teńgege páterler satqany anyqtaldy. Atyraý qalasyndaǵy №2 sottyń úkimimen seriktestik dırektory asa iri kólemde alaıaqtyq jasaǵany úshin kináli dep tanyldy. Ol 5 jylǵa bas bostandyǵynan aıryldy. Al, «Nazik Group» JShS-niń dırektory men «Atameken Turǵyn Úı», «Family Town» jáne «Baisanat Residence» turǵyn úı kooperatıviniń quryltaıshysy da osyǵan uqsas faktiler boıynsha sottaldy», - dep habarlady oblystyq prokýratýradan.

Bıyl prokýrorlyq qadaǵalaýdyń nátıjesinde 2 qurylys kompanııasy ákimshilik jaýaptylyqqa tartylǵan. Bul kompanııalar 1 mıllıon teńge kóleminde aıyppul tóledi.

«Oblystyq prokýratýra qyzmetkerleri azamattardyń úlestik qurylys naryǵyndaǵy quqyqtarynyń saqtalýyn baqylaýda ustap otyr. Úleskerlerdiń páterlerin ýaqytyly alý úshin quqyqtarynyń buzylýyna jol bermeıdi», - dep málim etti oblystyq prokýratýradan.

Eske sala ketelik, buǵan deıin Atyraýda 8 laýazymdy tulǵa tártiptik jaýapkershilikke tartylǵanyn habarlaǵan edik.