Atyraýda kommýnaldyq menshikke alynǵan 9 kanalǵa ishnara jóndeý júrgizilip jatyr
ATYRAÝ. KAZINFORM — Atyraý oblysynda gıdrotehnıkalyq qurylystardy qaýipsizdigin qamtasyz etý úshin qurylǵan «Tabıǵat» KMK-nyń ıeliginde 21 kanal bar. Qazir 9 kanalǵa jóndeý jumysy jalǵasyp jatyr.
Kásiporyn Aslanbek Rysjanovtyń aıtýynsha, bıyl aqpannan beri «Qazsýashar» RMK teńgerimindegi 12 kanal men «Eraly» sý toraby atalǵan kásiporyn menshigine berilgen.
— Qazir kásiporyn teńgerimindegi 21 kanaldyń 9-yna ishinara jóndeý jumystary júrgizilip jatyr. Kanaldardyń bastaý bóligi qazylyp, sý ótkizý múmkindigin arttyrý úshin arnasyn keńeıtý, tereńdetý qolǵa alyndy. Qosymsha kanaldar qazyldy. Máselen, «Naryn» kanalynda 40, «Sbornyıda» — 2,7, «Baqsaıda» — 10, «Esirkepte» — 2,2, «Martyshıda» — 2,5, «Kobıakovo-Zabýrýnda» — 1,5, «Saryózekte» — 5, «Alǵada» — 1,7 jáne «7-aýyl — Aısary» kanalynyń 2,2 shaqyrymyndaǵy jumys aıaqtaldy. Bul jobany jalǵastyra beremiz, — deıdi Aslanbek Rysjanov.
Onyń deregine súıensek, byltyr tamyzda qurylǵan kásiporynda 200-ge jýyq adam jumys isteıdi. Respýblıkalyq mekemeden 31 tehnıka, jergilikti ákimdik arqyly mobılızatsııa tártibimen 3 júk kóligi men 1 avtokran alynǵan.
— Kanaldardy jóndeýmen birge tazalaý jumysyn atqaramyz. Jaǵalaýdy qamys pen shógindi topyraqtan tazartamyz. Teńgerimdegi kópirlerdiń astyndaǵy sý ótkizgish qubyrlar da tazalanyp jatyr, — dep málim etti Aslanbek Rysjanov.
Máselen, Sokolok kanalynyń uzyndyǵy — 43,6 shaqyrym. Qazir kanalǵa bóget salý, tereńdetý jumystarynyń 70 paıyzy aıaqtalǵan. Joba jetekshisi Nurlan Nurbaevtyń aıtýynsha, kanalyndyń Jaıyq ózeninen Kaspıı teńizine deıingi aralyǵynda 33 shaqyrym bóget salynǵan.
— Maqsat — atalǵan kanalmen Jaıyq ózenimen keletin artyq sýdy Atyraý qalasyna jibermeı, tikeleı Kaspıı teńizine baǵyttaý. Buryn kanaldaǵy sýdyń jaıylmaǵa shyǵýyna tosqaýyl bolatyn bóget salynbaǵan edi. Bıyl 1 naýryzda bastalǵan bóget qurylysyn jeltoqsanda aıaqtaý josparlanyp otyr. Bógettiń bıiktigi — 3, eni — 6 metr. Kanal arnasy 15-ten 50 metrge deıin keńeıtilip, túbi 2 metrge tereńdetildi, — deıdi Nurlan Nurbaev.
Bul jumysty atqarýǵa tartylǵan «Stroı Statýs KZ» JShS-dan 57 adam táýlik boıy aýysymmen jumys isteıdi. Olarǵa 25 tehnıka bólingen.
Eske sala ketelik, budan buryn Atyraýda byltyrǵy sý tasqyny jyrǵan joldy jóndeý qashan bitetinin habarlaǵan bolatynbyz.