Atyraýda kólshikterde qutqarylǵan shabaq sany 12 mıllıonnan asty
ATYRAÝ. KAZINFORM — Atyraý oblysynyń Qurmanǵazy aýdanynda kóktemgi tasqyn sý qaıtqannan keıin oqshaýlanyp qalǵan kólshikter men saılardan 12 mıllıon 237 myń shabaq qutqaryldy. Balyq qoryn saqtaýǵa baǵyttalǵan jumysqa 80-nen asa adam men 20-dan asa tehnıka jumyldyryldy.
Aýdandyq kásipkerlik jáne aýyl sharýashylyǵy bóliminiń málimetinshe, shabaqtardy qutqarý jumystary 15 maýsymda bastalǵan.
Naýqanǵa Qurmanǵazy balyq ınspektsııasynyń mamandary, aýdan ákimdigine qarasty jergilikti atqarýshy organdardyń qyzmetkerleri, aýyldyq okrýg ákimdikteri, «Jastar resýrstyq ortalyǵy» men «Jasyl el» baǵdarlamasynyń qatysýshylary jumyldyrylǵan.
Sonymen qatar aýdandaǵy balyq sharýashylyǵy sýbektileri arnaıy qutqarý brıgadalaryn quryp, shabaqtardy qutqarý jumysyn júrgizip jatyr.
— Jaýapty mamandar Safon, Birlik, Nurjaý, Bókeıhan, Kýdrıashov, Shortanbaı, Orly, Eńbekshi, Teńiz jáne Dyńǵyzyl aýyldyq okrýgterindegi 51 ýchaske men jalpy aýmaǵy 3412 gektardy quraıtyn sý aıdyndaryn baqylaýǵa alǵan. Onda kún saıyn balyqtyń tunshyǵý qaýpi qadaǵalanyp, jappaı qyrylýdyń aldyn alý sharalary júrgizilip jatyr, — dep málimdedi aýdan ákimdigi.
Aýdandyq kásipkerlik jáne aýyl sharýashylyǵy bóliminiń málimetine súıensek, 15 maýsym men 7 shilde aralyǵynda 6453 tekshe metr saı qazylyp, 11 myń 146 sharshy metr aýmaq shópten tazartyldy. Jumysqa 81 adam, 21 tehnıka jáne 183 qural-jabdyq tartylǵan.
Qutqarylǵan shabaqtardyń basym bóligin qyzylqanat, kókserke, móńke, sazan, shortan, qarakóz, taban jáne jaıyn quraıdy. Bir shabaqtyń ortasha salmaǵy 1,6 gramm.
Bıyl Qurmanǵazy aýdanyndaǵy ózenderge sý mol kelip, aýdan aýmaǵyndaǵy barlyq 123 sý aıdynyna jetti. Sonyń nátıjesinde buryn sý baspaǵan jerlerde qosymsha 22 kólshik paıda bolǵan.
