Atyraýda kólshikterde qalyp qoıǵan 5,4 mln balyq shabaǵy qutqaryldy
ATYRAÝ. KAZINFORM — Atyraý oblysynyń Qurmanǵazy aýdanynda kóktemgi tasqynnan keıin ózenderden bólinip qalǵan ondaǵan kólshikte mıllıondaǵan balyq shabaǵy qalyp qoıǵan. Sý deńgeıi tómendegendikten olardyń qyrylý qaýpi týyndap, aýdanda qutqarý jumysty júrip jatyr.
Bıyl Qurmanǵazy aýdanyndaǵy ózenderge sý mol kelip, aýdan aýmaǵyndaǵy barlyq 123 sý aıdynyna jetti. Sonyń nátıjesinde buryn sý baspaǵan jerlerde qosymsha 22 kólshik paıda bolǵan.
Qazir Qıǵash jáne Sharon ózenderi men olardyń salalaryndaǵy sý deńgeıi kúrt tómendep, ózenderden bólinip qalǵan 68 kólshik pen saıda sý turyp qalǵan. Mamandardyń málimetinshe, sý aıdyndarynda ósimdikterdiń shamadan tys kóbeıýi qutqarý jumystaryn qıyndatyp otyr.
Balyq shabaqtaryn qutqarý jumystary 15 maýsymnan beri jalǵasýda. Oǵan Qurmanǵazy balyq ınspektsııasy bóliminiń mamandary, balyq sharýashylyǵy sýbektileri, jergilikti atqarýshy organ, «Jastar resýrstyq ortalyǵy» men «Jasyl el» baǵdarlamasynyń qatysýshylary jumyldyrylǵan.
— Búginge deıin ınspektsııa mamandarynyń uıymdastyrýymen 5 mıllıon 407 myń dana balyq shabaǵy qutqaryldy. Qutqarylǵan shabaqtardyń basym bóligin qyzylqanat, kókserke, móńke, sazan, shortan, qarakóz, taban jáne jaıyn quraıdy. Shabaqtardy tabıǵı sý arnalaryna shyǵarý úshin bólinip qalǵan kólshikterdi jalǵaıtyn 4 823 tekshe metr aryq qazylyp, 7 442 sharshy metr aýmaqtaǵy shóp shabyldy. Bul jumysqa 380 adam, 34 arnaıy tehnıka jáne 600 qutqarý quraly tartyldy, — dedi Jaıyq-Kaspıı oblysaralyq basseındik balyq sharýashylyǵy ınspektsııasynyń balyq sharýashylyǵy, monıtorıng jáne tsıfrlandyrý bóliminiń bas mamany Almas Jumashev.
Qazir Safon, Birlik, Nurjaý, Bókeıhan, Kýdrıashov, Shortanbaı, Orly jáne Eńbekshi aýyldyq okrýgterindegi sharýa qojalyqtary aýdan aýmaǵyndaǵy 51 ýchaskede ornalasqan jalpy kólemi 3 412 gektar sý aıdynynda balyq shabaqtaryn qutqarý jumysy jalǵastyryp jatyr.
Inspektsııa turǵyndardy jaıylma sýlarda qyrylý qaýpi bar balyqtar men balyq shabaqtaryn baıqaǵan jaǵdaıda balyq sharýashylyǵy ınspektsııasyna nemese jergilikti atqarýshy organdarǵa habarlaýǵa shaqyrdy.
Buǵan deıin bekire qoryn saqtaý úshin Jaıyqqa mıllıonnan astam shabaq jiberilgenin jazǵan edik.
