Atyraýda kólikti mas kúıde aıdaǵan 100-ge jýyq júrgizýshi ustaldy

ATYRAÝ. KAZINFORM — Atyraý oblysynda 19 sáýirden beri jol qozǵalysy erejesin buzýǵa baılanysty 10 myńǵa jýyq derek anyqtalǵan.

Atyraý oblystyq jergilikti polıtsııa qyzmeti basqarmasynyń ınspektory Aıbek Álımovtiń aıtýynsha, 19 sáýirden beri «Qaýipsiz jol» jedel-profılaktıkalyq is-sharasy ótkizilip jatyr. 

— Atalǵan is-sharany ótkizýdegi negizgi maqsat — jol-kólik oqıǵalarynyń aldyn alý, jol qozǵalysy qaýipsizdigin qamtamasyz etý. Patrýldik polıtsııa qyzmetkerleri reıdtik sharalar kezinde jol qozǵalysy erejesin buzýymen baılanysty 10 myńǵa jýyq derekti anyqtady. Onyń ishinde mas kúıinde kólik júrgizgen 98 júrgizýshi ustaldy. Al, 99 júrgizýshiniń joldyń qarsy baǵytyna shyqqany, 63 adamnyń apattyq jaǵdaı týǵyzǵany tirkeldi. Kólik rólindegi 400-den astam júrgizýshi mobıldi telefon qoldansa, 2400-ge jýyq azamat qaýipsizdik beldigin taqpaǵany belgili boldy, — deıdi Aıbek Álımov.

Inspektordyń deregine súıensek, 293 adam kólikti júrgizýshi kýáliginsiz aıdaǵany anyqtalǵan. Aıyp turaǵyna 502 avtokólik qoıylǵan. Sondaı-aq, 255 kóliktiń memlekettik nómiri alynǵan. 

— Atyraý qalasyndaǵy jolda qoǵamdyq tártip pen qaýipsizdikti saqtaý maqsatynda baqylaý kúsheıtildi. Mundaı baqylaýdy shahar aýmaǵynan tys jolda da júrgizý qolǵa alyndy, — dep málim etti Aıbek Álımov.

Eske sala keteıik, budan buryn mas kúıde bótenniń kóligin búldirgen atyraýlyq 5 kúnge qamalǵanyn jazǵan bolatynbyz.