Atyraýda kólik ishinen otshashý atqandar qamaýǵa alyndy
ATYRAÝ. KAZINFORM – Atyraý qalasynda birneshe azamat jol boıynda qaýipti manevr jasap, avtokólik ishinen áýege otshashý atqan.
Atyraý oblystyq PD málimetinshe, kólik júrgizýshisine jol qozǵalysy qaǵıdalaryn buzyp, qaýipti manevr jasap, avarııalyq jaǵdaı týdyrǵany úshin jáne jolaýshysynyń kólik terezesinen denesin shyǵarǵan kúıde kólik basqarǵany úshin ákimshilik hattamalar toltyryldy.
– Atalǵan tulǵalarǵa qatysty usaq buzaqylyq, eldi mekenderde pırotehnıkalyq buıymdardy qoldaný jáne túngi tynyshtyqty buzý derekteri boıynsha da ákimshilik sharalar qabyldandy. Buzaqylyq deregi boıynsha júrgizýshi men jolaýshy ákimshilik qamaýǵa alyndy. Avtokólik arnaýly turaqqa qoıyldy, - dep málimdedi departamenttiń baspasóz qyzmeti.
Polıtsııa jol qozǵalysy kezinde jasalǵan kez kelgen quqyq buzýshylyq zań aıasynda jaýapkershilikke ákep soǵatynyn eskertti.
Buǵan deıin Astanadaǵy «Báıterekke» qurmetsizdik tanytqan astanalyq qamaýǵa alynǵany jóninde jazǵan edik.
