Atyraýda kólik qaqqan 59 jastaǵy áıel oqıǵa ornynda kóz jumdy
ATYRAÝ. KAZINFORM – Atyraý qalasynda 59 jastaǵy áıeldi kólik qaǵyp ketti. Jaıaý júrginshi oqıǵa ornynda mert boldy.
Atyraý oblystyq polıtsııa departamentiniń baspasóz qyzmeti rastaǵan aqparatqa súıensek, jol-kólik oqıǵasy búgin, 6 jeltoqsanda bolǵan.
«Búgin tańǵy saǵat 07:00 shamasynda Atyraý qalasynyń «Saryqamys» shaǵyn aýdanyndaǵy Turan kóshesiniń boıynda Toyota Camry avtokóliginiń júrgizýshisi jaıaý júrginshini qaǵyp ketti. Jol-kólik oqıǵasynyń saldarynan 59 jastaǵy áıel oqıǵa ornynda qaza tapty», - dep habarlady departamenttiń baspasóz qyzmeti.
Belgili bolǵandaı, áıel jaıaý júrginshilerge arnalǵan jolaqtan ótip bara jatqan. Ony qaqqan júrgizýshi baıaý jyldamdyqpen kele jatqanyn málimdegen. Qazi atalǵan jol-kólik oqıǵasyna baılanysty tıisti is-qujattar jınaqtalyp jatyr.
«Júrgizýshilerge aýa raıynyń qolaısyzdyǵyna, joldyń taıǵaq bolýyna baılanysty saqtyq sharalaryn qatań saqtaýdy eskertemiz. Táýliktiń barlyq mezgilinde, ásirese, tańǵy jáne keshki ýaqytta saq bolǵan jón», -dep málim etti departamenttiń baspasóz qyzmetinen.
Eske sala ketelik, buǵan deıin Atyraý oblysynda jeńil kólik aýdarylyp, júrgizýshi oqıǵa ornynda mert bolǵanyn habarlaǵan edik.