Atyraýda kólik qaqqan 2 bala aýrýhananyń jansaqtaý bólimine tústi

ATYRAÝ. KAZINFORM – Atyraý qalasynda 2 jáne 5 jastaǵy 2 balany kólik qaǵyp ketti. Zardap shekken balalar aýrýhananyń jansaqtaý bólimine jatqyzyldy.

Atyraý qalalyq polıtsııa basqarmasynyń aǵa ınspektory Ashat Shodymovtyń aıtýynsha, jaıaý júrginshilerdiń, ásirese balalardyń jol-kólik oqıǵasynan zardap shegýi alańdatarlyq jaıtqa aınalǵan. 

– Máselen, 1 shilde kúni saǵat 18:30 shamasynda «Kia Sorento» avtokóligin aıdap kele jatqan 47 jastaǵy júrgizýshi 2023 jylǵy balany qaǵyp ketti. Aýyr jaraqat alǵan balaqaı oblystyq balalar aýrýhanasynyń jansaqtaý bólimine jatqyzyldy. Osy tektes oqıǵa 3 shilde kúni saǵat 18:50 shamasynda tirkeldi. «Lada Granta» avtokóliginiń júrgizýshisi 2020 jylǵy balany qaǵyp, densaýlyǵyna zaqym keltirdi. Bala aýrýhananyń jansaqtaý bólimine tústi, -deıdi Ashat Shodymov.

Onyń aıtýynsha, atalǵan derekter boıynsha tergeý amaldary júrgizilip jatyr.

– Ata-analarǵa balalardy úı aýlasynda qaraýsyz qaldyrmaýdy eskertemiz. Al kólik júrgizýshileriniń nazaryna qaýipsizdik erejelerin saqtaýdyń qajettigin salamyz, -dep málim etti Ashat Shodymov.

Este sala ketelik, buǵan deıin Atyraýda kámeletke tolmaǵan 2 jasóspirim sýıtsıd jasaǵanyn jazǵan bolatynbyz.