Atyraýda kólik qaǵyp ketken 8 jasar oqýshy oqıǵa ornynda kóz jumdy
ATYRAÝ.KAZINFORM — Atyraý qalasynda Ál-Farabı atyndaǵy BINOM mektep-lıtseıiniń aldyndaǵy jaıaý júrginshiler jolynan ótip bara jatqan 8 jasar oqýshy qyzdy kólik qaǵyp ketti. Saldarynan búldirshin oqıǵa ornynda kóz jumdy.
PD málimetine súıensek, oqıǵa 6 sáýir kúni tańǵy saǵat 7:45 shamasynda bolǵan. Jaıaý júrginshiler jolynan ótip bara jatqan 2018 jyly týǵan jetkinshekti Toyota Hiace avtokóligi qaǵyp ketken. Júrgizýshi — 52 jasta.
— Atalǵan derek boıynsha qylmystyq is tirkelip, tergeý júrgizilip jatyr. Polıtsııa departamenti júrgizýshilerdi jol qozǵalysy erejelerin qatań saqtaýǵa, ásirese jaıaý júrginshiler ótkelderinde jyldamdyqty tómendetip, asa muqııat bolýǵa shaqyrady. Ata-analarǵa balalardyń joldaǵy qaýipsizdigin qatań baqylaýda ustaý qajettigin eskertedi, — dep málimdedi PD baspasóz qyzmeti.
Buǵan deıin Qaraǵandy mańynda aýdarylǵan avtobýsta zardap shekkenderdiń basym bóligi úıine jiberilgenin jazǵan edik.
