Atyraýda qoldanystaǵy ortalyq kópirdiń qasyna jańasy salynýy múmkin
ATYRAÝ.KAZINFORM — Atyraý qalasyndaǵy eń eski, 1965 jyly paıdalanýǵa berilgen ortalyq kópirdiń qasyna jańa kópir salý jobasy qarastyrylyp jatyr. Atyraý qalasynyń ákimi Shákir Keıkın bul jobany qytaılyq kompanııa jasap jatqanyn málimdedi.
Shahar basshysynyń aıtýynsha, ákimdik bul jumysty álemdegi úzdik 500 kompanııanyń qataryna jatatyn qytaılyq mekemege tapsyrǵan. Joba boıynsha olar qoldanystaǵy kópirden 10 metr qashyqtyqta jańasyn salýdy josparlap otyr. Jańa kópirdiń qurylysy aıaqtalǵannan keıin eskisin qoldaný joldary qarastyrylmaq. Bıyl sheteldik kompanııa ókilderi ákimderge jobanyń jaı-japsaryn tanystyryp ketipti. Qurylystyń Jaıyq ózeniniń qos jaǵalaýyna qalaı júrgiziletinin kórsetken. Qazir jobany jetildirýde. Naýryz aıynda taǵy da jobany pysyqtap, Atyraý bıligine tanystyrady.
Qazirgi ýaqytta ortalyq kópirdiń astynan 400 dıametrlik jylý qubyry ótip jatyr. Bul qubyr oń jaǵalaýdaǵy kópqabatty úıler men áleýmettik nysandarǵa jylý berip otyr. Shákir Keıkınniń sózinshe, «Nursaıa» yqsham aýdanynda salynyp jatqan jańa áleýmettik nysandarǵa osy qubyrdyń jylý berý múmkindigi jetpeıdi.
— Jylý jelilerimen aınalysatyn mekeme jańa kópirdiń astyna 700 dıametrlik qubyr júrgizý máselesin usynyp otyr. Biz bir oqpen eki qoıan atyp, jylý júıemiz de, kópirdi de jańartý oıymyz bar. Tolyq jumysty bastaý úshin joba memlekettik saraptamadan ótip, qarjy máselesi sheshilý kerek.Aımaq basshysy qytaılyq kompanııaǵa bul jobany tezdetýdi tapsyrdy, — dedi Atyraý qalasynyń ákimi Shákir Keıkın
Aıta keteıik, ortalyq kópir salynǵannan keıin bir ret kúrdeli jóndelgen. Búginde qalanyń ınfraqurylymynda erekshe mańyzǵa ıe.
2020 jyldyń qańtarynda jylý qubyry tirekteriniń yǵysýyna baılanysty kópirde kólik qozǵalysy ýaqytsha toqtatyldy. Keıin sheneýnikter nysandy jańǵyrtý boıynsha jobalyq-smetalyq qujattamany daıyndaýǵa kirisken edi. Odan beri bul kópirge aǵymdaǵy jóndeý jumystary ǵana júrgizilip keledi.
Buǵan deıin Atyraýdaǵy kópirlerdiń jaǵdaıyna júrgizýshilerdiń kóńili tolmaıtynyn jazǵan edik.