Atyraýda kóktemde salynǵan 590 shaqyrym bóget oblystyń teńgerimine alynady
ATYRAÝ. KAZINFORM — Atyraý oblysynda kóktemgi sý tasqyny kezinde 590 shaqyrym bóget salynǵan. Endi onyń sapasyn tekserip, oblystyń teńgerimine alý josparlanyp otyr.
Atyraý oblysynyń ákimi Serik Shápkenovtiń aıtýynsha, Jylyoı aýdanyndaǵy Qursaı kanaly men Jem ózeniniń arnasyn tereńdetý jumys bastalǵan.
«Qulsary qalasynyń aýmaǵymen ótetin Qursaı kanalynyń 32 shaqyrymy tazartylyp, tereńdetildi. Mundaı jumys osy aıda Jem ózeninde de bastaldy. Jalpy uzyndyǵy 55 shaqyrymdy quraıtyn jaǵalaýdyń 1,5 shaqyrymynda tazartylyp, arnasyn tereńdetý júrgizildi. Sý arnasynyń jaǵalaýynda 58 shaqyrym qorǵanys bógetin salý josparlanyp, onyń 24 shaqyrymy turǵyzyldy», — dedi Serik Shápkenov.
Oblys ákiminiń aıtýyna qaraǵanda, sý sharýashylyǵy salasyndaǵy qurylysty basqarý «Tabıǵat» kásipornyna júktelip otyr. Bul — jańadan qurylǵan kásiporyn.
«Atyraý oblysynda kóktemgi sý tasqyny kezinde 590 shaqyrym bóget turǵyzyldy. Endi ony oblystyń teńgerimine alý jumysy júrip jatyr. Kóktemge deıin atalǵan bógettiń sapasy tekseriledi. Kóktemde turǵyzylǵan bógettiń osal tusy nyǵaıtylady. Jaıyq ózeniniń Kaspıı teńizine quıar saǵasy tereńdetilip jatyr. Bul jumys ózenniń sý ótkizý qabiletin arttyrý maqsatynda qolǵa alyndy», — dedi Serik Shápkenov.
Onyń deregine súıensek, Qurmanǵazy aýdanyndaǵy Qıǵash ózeninde de tereńdetý jumysy jalǵasyp jatyr. Al, Mahambet aýdanynyń Taldykól aýylyn sý tasqynynan qorǵaý úshin 3 shaqyrym bóget turǵyzylǵan. Alaıda, eldi mekendi aldaǵy kóktemde bolýy yqtımal sý tasqynynan qorǵaý úshin bógettiń 2,1 shaqyrymyn qaıta jóndeý qajettigi týyndaǵan. Sondaı-aq, bógettiń 500 metrine ýaqytsha qapshyq salý qajet. Atalǵan jumysty atqarý úshin jobalyq-smetalyq qujattamasy jasaqtalǵan.
Eske sala ketelik, buǵan deıin Atyraý oblysynda Jaıyqtaǵy sý tasqynynan keıin 4 kanal tereńdetilip jatqanyn jazǵan edik.
