Atyraýda qoǵamdyq kólikterdi sýbsıdııalaýǵa shamamen 11 mlrd teńge kerek
ATYRAÝ. KAZINFORM — Bıyl Atyraý qalasyndaǵy qoǵamdyq kólikterdi sýbsıdııalaý úshin 11 mlrd teńgege jýyq qarjy kerek. Qarajattyń shekteýli bolýyna baılanysty jergilikti qazynadan ázirge 2 mlrd teńge bólingen.
Bul qarjy boljammen 3 aıǵa jetedi. Qalǵan mıllıardtar aldaǵy ýaqytta kezeń-kezeńimen qaralady.
Bul týraly Atyraý qalalyq jolaýshylar kóligi jáne avtomobılder joldary bólimi basshysynyń orynbasary Almas Sársenov málimdedi.
Mamandardyń sózinshe, sýbsıdııa kóleminiń artýyna janar-jaǵarmaı baǵasynyń, avtobólekterdiń qymbattaýy, jolaýshylar sanynyń, júrgizýshiler jalaqysynyń artýy syndy faktorlar áser etedi.
— Qazirgi ýaqytta qala aýmaǵynda 38 baǵyt bolsa, onyń 36-syna sýbsıdııa berilip otyr. Onyń kólemi jolaýshylardyń aǵynyna, baǵyt pen avtobýs sany sııaqty birneshe faktorǵa baılanysty. Arnaıy bekitilgen talap pen esepteý júıesi bar, soǵan sáıkes qarjylandyrylady, — dedi Atyraý qalalyq jolaýshylar kóligi jáne avtomobıl joldary bólimi basshysynyń orynbasary Almas Sársenov.
Suranysqa sáıkes 2025 jyldyń ortasynda qala ishinde 6 jańa baǵyt ashyldy. Bıyl 4 jańa baǵytty iske qosý josparlanyp otyr. Sheneýnikter aldaǵy ýaqytta tasymalǵa kúndelikti shyǵatyn avtobýs sanyn negizsiz qysqartyp, jolaýshylar tasymalynyń sapasyna keri áser etken jaǵdaıda tasymaldaýshy kompanııalarǵa aıyppul salmaq.
— Belgilengen keste boıynsha avtobýstardyń tolyq shyǵarylmaýy anyqtalǵan jaǵdaıda aıyppul sanktsııalary qarastyrylǵan. Qazirgi ýaqytta tasymaldaýshy mekemelermen jasalǵan kelisimsharttarǵa ózgeris engizilýde, — dedi Atyraý qalalyq jolaýshylar kóligi jáne avtomobıl joldary bólimi basshysynyń orynbasary Almas Sársenov.
Aıta keteıik, byltyr qoǵamdyq kólikterdi sýbsıdııalaýǵa 9 mlrd 340 mln teńge jumsalǵan. Bul qarjy 36 baǵytta qatynaıtyn avtobýstardyń jumysyn qarjylandyrýǵa jumsalǵan. Aıta keteıik, qazirgi ýaqytta 7 tasymaldaýshy mekemeniń 300-den astam avtobýsy 38 baǵyt boıynsha jolaýshy tasymaldaıdy.
Osyǵan deıin Atyraýda avtobýstaǵy tólem júıesinde taǵy bir básekeles paıda bolǵany jóninde jazǵan edik.