Atyraýda qoǵam belsendisi 625 mln teńgege júrgizilgen rekýltıvatsııaǵa kúmán keltirdi
ATYRAÝ. KAZINFORM — Qulsary mańyndaǵy 2,1 gektar jerdi rekýltıvatsııalaýǵa shamamen 625 mln teńge jumsalǵan. Ákimdik jumystyń 100 paıyz aıaqtalǵanyn aıtsa, qoǵam belsendisi jerdiń 40–50 santımetr tereńdiginen munaı qaldyǵyna uqsas qara materıal shyqqanyn málimdedi.
Jaýylbaı beıiti mańyndaǵy bul aýmaqtyń tarıhy birneshe jylǵa sozylǵan. Ákimdiktiń málimetinshe, 2014 jyly Qulsary qalasy ákiminiń sheshimimen jer telimi «SatTranseService» JShS-ne qaldyqtardy kádege jaratý jáne munaı qaldyqtaryn ornalastyrý polıgony úshin ýaqytsha óteýli jer paıdalaný quqyǵymen berilgen. Keıin aýmaq munaı qaldyqtarymen lastanǵan. Kompanııaǵa búlingen jerdi qalpyna keltirý mindeti júktelgenimen, rekýltıvatsııa júrgizilmegen. Osyǵan baılanysty jerdi qalpyna keltirýdi májbúrlep jasatý úshin sotqa talap aryz berilip, sot talapty qanaǵattandyrǵan. Biraq sot sheshimi de oryndalmaǵan.
2023 jyly Jylyoı aýdandyq prokýratýrasy búlingen jer telimin memleket menshigine qaıtaryp, Jol kartasy aıasynda tazalaý jumystaryn júrgizýdi usynǵan. Osydan keıin jer telimi memleket qaramaǵyna qaıtarylyp, rekýltıvatsııa máselesi jergilikti atqarýshy organdarǵa ótken.
Ekologııalyq problema tótenshe jaǵdaı deńgeıine jetken
Jaýylbaıdaǵy másele oblystyń ekologııalyq problemalaryn keshendi sheshýge arnalǵan jol kartasyna engizilgen. 2024 jyly oblystyq qorshaǵan ortany qorǵaý máseleleri jónindegi komıssııa otyrysynda jergilikti atqarýshy organǵa rekýltıvatsııa jumystaryn júrgizý júktelgen. Al 2025 jylǵy 20 naýryzda Qulsary qalasynda jergilikti aýqymdaǵy tehnogendik sıpattaǵy tótenshe jaǵdaı jarııalanǵan. Rekýltıvatsııa úshin arnaıy joba ázirlenip, oǵan saraptamanyń oń qorytyndysy alynǵan.
Keıin merdiger uıymdardan kommertsııalyq usynystar jınalyp, ákimdik málimetinshe, bıýdjettik qarajatty únemdeý maqsatynda «SIGMA Stroı Proekt» JShS-niń usynysy qabyldanǵan. Kompanııamen 2025 jylǵy 19 mamyrda kelisimshart jasalyp, jumystar shilde aıynda bastalǵan.
Joba boıynsha lastanǵan topyraqty jańa grýntpen aralastyrý, ony qopsytý jáne hımııalyq reagent qoldaný qarastyrylǵan.
Jerdiń astynda ne bar?
Jylyoı aýdanynyń turǵyny, qoǵam belsendisi Beket Qulbaev rekýltıvatsııa júrgizilgen aýmaqqa baryp, jerdiń jaǵdaıyn óz kózimen teksergen. Ol topyraqty shamamen 40–50 santımetr tereńdikke deıin qazǵanda qara tústi, ótkir ıisi bar materıal shyqqanyn aıtady.
— 40–50 santımetr tereńdikti qazǵanda qara tústi, ótkir ıisi bar materıal kórindi. Onyń munaı qaldyǵy nemese basqa zat ekenin zerthana anyqtaýy kerek, — dep pikir bildirdi belsendi Beket Qulbaev.
Ol belsendi aýmaqta taldardyń egilgenin de kórsetti.
— Aýmaq qorshalǵan, aǵashtar otyrǵyzylǵan. Taldy jáı ǵana qadap ketken deýge bolady. Qazir olar qýrap jatyr, — deıdi Beket Qulbaev.
Ákimdik: Jumys 100 paıyz aıaqtaldy
Jylyoı aýdany ákiminiń orynbasary Gúlnafıs Aıshýaqova belsendiniń pikirimen jergilikti atqarýshy organnyń kelispeıtinin aıtty. Resmı aqparatqa súıensek, bul ýchaskede jumys tolyq aıaqtalǵan.
— Qazirgi tańda joba aıasynda rekýltıvatsııalaý jumystary tolyqtaı aıaqtalyp, laboratorııalyq saraptamanyń oń qorytyndysy alyndy, — dep habarlady aýdan ákimdigi.
Rekýltıvatsııa jobasy aıasynda topyraqtyń astyńǵy qabatynyń munaı qaldyǵyna uqsaýy qanshalyqty qalypty? Bul jumystyń kepildik merzimi bar ma? Bul suraqtar jergilikti atqarýshy organǵa qoıylǵanmen, jaýap berilmedi.
Buǵan deıin Atyraýda qoǵam belsendileri «Teńizshevroıl» kompanııasyna júktelgen kógaldandyrý jumysyn synaǵanyn jazǵan edik.
