Atyraýda qyzylshamen aýyrǵan bir jasar qyz kóz jumdy

ATYRAÝ. KAZINFORM — Atyraýǵa Jylyoı aýdanynan sanıtarııalyq avıatsııa arqyly oblystyq juqpaly aýrýlar aýrýhanasyna jetkizilgen bala kóz jumdy. Bul aqparatty oblystyq densaýlyq saqtaý basqarmasy rastady.

Atyraýda qyzylshamen aýyrǵan bir jasar qyz kóz jumdy
Foto: pixabay

Basqarmanyń resmı málimetine qaraǵanda, bir jasar qyz 14 qarasha kúni aýyr halde oblystyq juqpaly aýrýlar aýrýhanaǵa jetkizilgen. Buǵan deıin ol aýdandyq aýrýhanada em qabyldaǵan. Qyzylsha juqtyrǵan kishkentaıdyń statsıonarǵa túsken kezde jaǵdaıy asa aýyr bolǵan.

— Negizgi aýrýynyń asqynýy saldarynan ekijaqty pnevmonııa, tynys alý jáne júrek jetkiliksizdigi damyǵan. Dárigerler qarqyndy terapııanyń tolyq keshenin júrgizgenimen, balanyń ómirin saqtap qalý múmkin bolmady, — dep málimdedi basqarmanyń baspasóz qyzmeti.

Óńirdegi qyzylshaǵa qatysty epıdemıologııalyq ahýalǵa kelsek, bıyl 1 qazan men 17 qarasha aralyǵynda zerthanalyq jolmen rastalǵan 45 jaǵdaı tirkelgen. Byltyr osy kezeńde 78 jaǵdaı anyqtalǵan.

Qazir statsıonarda qyzylshaǵa kúdik bar jáne dıagnozy rastalǵan 7 naýqas em qabyldap jatyr. Onyń tórteýinen ınfektsııa zerthanalyq jolmen rastalsa, qalǵan úsheýine ázirge kúdik bar. Medıtsınalyq mekemege túsken naýqastardyń basym bóligi qyzylshaǵa qarsy ekpe almaǵan.

Oblystyq densaýlyq saqtaý basqarmasy aýrýshańdyq kórsetkishi ótken jyldyń sáıkes kezeńimen salystyrǵanda tómendegenine qaramastan, saqtyq sharalaryn ustanyp, vaktsına saldyrýǵa shaqyrdy.

Buǵan deıin BQO-da qyzylshamen aýyrǵandar sany 17 esege jýyq artyp ketkenin jazǵan edik.