Atyraýda Qytaı ınvestorynyń qarjysyna qant zaýyty salynýy múmkin

ATYRAÝ. KAZINFORM – Atyraýda qant shyǵarý zaýytynyń qurylysyn bastaý máselesi talqylandy. Jań zaýyt jobasynyń 80 paıyzyn Qytaı ınvestory qarjylandyrýǵa nıet bildirgen.

Atyraý oblysynyń ákimi Serik Shápkenovtiń málimetinshe, qanttyń 90 paıyzy ózge elden ımporttalady. Sol sebepten, «Goldbrıdj halyqaralyq kompanııasy» JShS-niń qant shyǵaratyn zaýyt salý jobasyna qoldaý bildirdi.

– Bul – bizdiń tıimdi joba. Atyraý oblysynyń jeri qyzylsha ósirýge qolaıly. Aýyl sharýashylyǵynyń áleýetin paıdalanyp, ishki naryqty óz ónimimizben qamtamasyz etýge bolady. Agrarlyq sektordy jandandyrýǵa serpin beredi. Eger qant zaýyty salynatyn bolsa, ınfraqurylymmen qamtýǵa daıynbyz, - deıdi Serik Shápkenov.

Al kompanııa basshysy Lına Taıkenniń aıtýynsha, munaıly óńir turǵyndarynyń qantqa suranysy zerttelgen. Munaıly óńirde qant zaýytyn salý úshin jer telimi qajet.

– Biz Atyraý oblysynda jylyna 144 myń tonna qant shyǵaratyn zaýyt salý jobasyn usynyp otyrmyz. Bul joba Atyraýdyń ǵana emes, ózge óńirlerdiń de qantqa suranysyn óteýge jol ashady. Osy oraıda qyzylshadan ashytqy óndiretin qytaılyq jetekshi kompanııamen tájirıbe almasyp, tehnologııasyn jan-jaqty zerttedik. Qytaı kompanııasy bizdiń jobany qoldap, qajetti qarjynyń 80 paıyzyn ınvestıtsııalaýdy kózdep otyr. Jobany Atyraý oblysynda júzege asyrýǵa 1,5 jyl merzim kerek. Eger resmı qujattar ýaqytyly daıyndalsa, 2026 jyldyń jazynda zaýytty iske qosamyz. Sol kezde qyzylshadan qanttan ózge tórt túrli ónim shyǵaramyz, - dedi Lına Taıken.

Ákimniń aıtýynsha, jańa zaýyt úshin jer telimi máselesin sheshý qarastyrylady. Sondaı-aq úsh jaqty memorandýmǵa qol qoıý úshin tıisti qujattar daıyndalady.

Eske sala ketelik, budan buryn Atyraý oblysynyń turaqtandyrý qorynan 1,4 myń tonna kartop satylǵanyn habarlaǵan bolatynbyz.