Atyraýda Qıǵash ózeniniń deńgeıi 1 metrge jýyq kóterilgen
ATYRAÝ. KAZINFORM — Jyl basynan beri Qurmanǵazy aýdanynan ótip jatqan Qıǵash ózeniniń sý deńgeıi 1 metrge jýyq kóterilgen. Degenmen aýdan ákimdigi qazirgi ýaqytta gıdrologııalyq jaǵdaıdyń turaqty ekenin aıtty.
2026 jyldyń 28 sáýirdegi aqparat boıynsha, Qıǵash ózeniniń Bókeıhan aýyly tusyndaǵy sý deńgeıi 215 santımetrdi qurap, táýligine 9 santımetrge artqan. Qaýipti deńgeı — 518 santımetr. Shortanbaı aýyly mańynda sý deńgeıi 367 santımetrge jetip, 7 santımetrge kóterilgen. Bul tusta qaýipti shek — 555 sm.
Qıǵash ózeni Kaspıı teńizinen shamamen 75 shaqyrym qashyqtyqta ornalasqan. Ózenniń eni 80-100 metr aralyǵynda, al eń tereń tusy 4,6 metrge deıin jetedi.
Sharon ózenindegi jaǵdaı da turaqty. Qurmanǵazy aýyly tusyndaǵy sý deńgeıi 211 santımetrdi qurap, bir táýlikte 5 santımetrge kóterilgen. Qaýipti deńgeı — 422 santımetr. Ózen eldi mekender aýmaǵy arqyly 98 shaqyrymǵa sozylyp, Qurmanǵazy aýylynan ońtústikke qaraı shamamen 35 shaqyrym jerde Kaspıı teńizine quıady. Onyń eni 35-50 metr, ortasha tereńdigi 3,16 metr.
— Negizgi kóktemgi sý tasqyny ortasha eseppen 47 kúnge sozylady. Osy jyldyń 1 qańtarynan bastap Qıǵash ózenindegi sý deńgeıi 5,85 metrden 6,72 metrge deıin, ıaǵnı 0,87 metrge kóterildi. Búgingi tańda Dyńǵyzyl aýylynda jalpy uzyndyǵy 3813 metr, Shortanbaı aýylynda 1 585 metr, Kóptoǵaı aýylynda 3747 metr bóget kóterý jumystary júrgizildi. Respýblıkalyq, oblystyq jáne aýdandyq mańyzy bar avtojoldarda sý shaıyp ketýi múmkin qaýipti ýchaskeler anyqtalmady, — dep málimdedi Qurmanǵazy aýdandyq ákimdigi.
Jalpy Qıǵash ózenindegi sý tasqyny rejımi Volgograd sý qoımasynan keletin sý kólemine baılanysty qalyptasady. Reseılik gıdrologııalyq qyzmetterdiń málimetinshe, 11 sáýirden bastap Voljsk GES-i Edildiń tómengi aǵysyna sý jiberýdi kezeń kezeńimen arttyrǵan. 24 sáýirde sý jiberý kólemi sekýndyna 26 myń tekshe metrge jetken. Qazirgi ýaqytta sý jiberý kólemi birtindep azaıyp jatyr: 27 sáýir men 1 mamyr aralyǵynda — 24 myń tekshe metr. Al 6 mamyrǵa qaraı shamamen 19 myń tekshe metrge deıin tómendeýi kútiledi.
Mamandar sý jiberý kólemi gıdrometeorologııalyq jaǵdaıǵa baılanysty ózgerýi múmkin ekenin aıtady.
Aıta keteıik, Qurmanǵazy aýdanynda tasqynǵa 128 tehnıka ázirlengen. Onyń quramynda órt sóndirý kólikteri, traktorlar, avtobýstar, júk kólikteri, ekskavatorlar men qaıyqtar bar.
Buǵan deıin Qıǵash ózeniniń arnalaryn tereńdetý jumysy júrip jatqany jóninde jazǵan edik.
