Atyraýda qazandyqtaǵy jarylystan zardap shekken er adamnyń jaǵdaıy aýyr
ATYRAÝ. KAZINFORM – Atyraý qalasynyń «Avangard-2» yqshamaýdanynda qazandyqta bolǵan jarylystan zardap shekken 53 jastaǵy er adamnyń jaǵdaıy aýyr. Bul týraly oblystyq aýrýhana ókilderi málimdedi.
Oqıǵa búgin tańerteń úsh qabatty ǵımaratqa japsarlas ornalasqan qazandyqta bolǵan. Gaz-aýa qospasynyń jarylýy saldarynan jaqyn mańdaǵy kópqabatty turǵyn úıdiń terezeleri men eki jeńil kólik zaqymdanǵan edi.
Zardap shekken er adam saǵat 11:00 shamasynda Atyraý oblystyq aýrýhanasynyń neırohırýrgııa bólimshesine jetkizilgen.
- Naýqastyń dıagnozy – aralas jaraqat, beti men joǵarǵy aıaq-qoldarynyń kúıigi jáne aýyr ashyq bas-mı jaraqaty. Qazir ol neırohırýrgııa bólimshesinde em alyp jatyr. Jaǵdaıy aýyr, degenmen turaqty. Barlyq medıtsınalyq kómek kórsetilip jatyr, – dedi Atyraý oblystyq aýrýhanasynyń bólimshe meńgerýshisi Erkin Erbólekov.
Atyraý qalasy ákimdiginiń málimetinshe, shahar basshysynyń orynbasary oqıǵa ornyna baryp, jaǵdaımen tolyq tanysqan.
- Ǵımarat ıesi keltirilgen shyǵyndy tolyq óteıdi. Qazir zaqymdanǵan terezelerdiń ólshemderi alynyp, olardy qalpyna keltirý jumysy eki merdiger mekeme tarapynan júrgiziletin bolady, - dep málimdedi ákimdiktiń baspasóz qyzmeti.
Tótenshe jaǵdaılar departamentiniń qyzmetkerleri men polıtseıler oqıǵanyń mán-jaıyn anyqtaý boıynsha tıisti tekseristi bastap ketken.
Buǵan deıin Aqtóbede Dóń taý-ken baıytý kombınatynyń shahtasynda jumysshysy qaza tapqanyn jazǵan edik.
