Atyraýda qaıtarylǵan qarjy esebinen mektep-ınternattyń qurylysy bastaldy
ATYRAÝ. KAZINFORM – Atyraý oblysynyń Jamansor aýylynda jańa mektep-ınternattyń irgetasy qalandy. Bilim ordasynyń qurylysy qaıtarylǵan qarjy esebinen júrgiziledi.
Qyzylqoǵa aýdanynda temirjol boıynda ornalasqan Jamansor eldi mekeninde mektep jasyndaǵy 200-ge jýyq bala bar. Bastaýysh synyptyń oqýshylary 60 orynǵa beıimdelgen ǵımaratta bilim alýǵa májbúr. Beıimdelgen nysanda sport jáne akt zaly joq.
Qazir bastaýysh synyptar men daıyndyq toptarynda 64 bala tirkelgen. Al joǵary synyptardyń oqýshylary Atyraý men Qulsary qalalaryndaǵy, Maqat jáne Muqyr stansalaryndaǵy mektep-ınternatta oqyp júr.
Atyraý oblysy ákiminiń orynbasary Qaırat Nurtaevtyń aıtýynsha, qurylysy bastalǵan mektep-ınternatta eki blok qarastyrylǵan. Onyń biri – 80 oryndyq mektep, al ekinshisi – 30 orynǵa eseptelgen ınternat.
– Memleket basshysynyń aıqyn ustanymy – qaıtarylǵan qarjyny el ıgiligine jumsaý. Osyndaı qarjynyń esebinen Jamansor aýylynda jańa mektep-ınternattyń qurylysy bastaldy. Bul joba shalǵaı aýyldaǵy balalardyń sapaly bilim alýyna qolaıly jaǵdaıdyń kepili bolady, - deıdi Qaırat Nurtaev.
Bul nysannyń qurylysy prokýratýranyń baqylaýynda alynyp otyr. Atyraý oblysynyń prokýrory Baýyrjan Jumahanovtyń aıtýyna qaraǵanda, mektep-ınternattyń qurylysyn aldaǵy qarasha aıynda aıaqtaý kózdelgen.
Jamansor aýylynyń turǵyndary mektep-ınternat qurylysynyń bastalǵan qýanyshty jańalyq retinde qabyldap otyr. Aýyl turǵyny Baǵdabaı Amanovtyń aıtýynsha, buryn balalaryn ózge aýyldardaǵy mektep-ınternattarǵa tasymaldaǵan.
– Balalardyń ata-anasynyń janynda bilim alǵany jón ǵoı. Alaıda, osy kezge biz mundaı múmkindikke qol jetkize almadyq. Óıtkeni, Jamansorda bilim ordasy joq. Sol sebepten, oqýshylardy kórshiles eldi mekenderdegi ınternattarǵa jiberetin edik. Balalaryn ata-anasynan jyraqtaýdy qalamasa da amalsyzdan ketetin edi. Endi óz aýylymyzda zamanaýı mektep-ınternat ashylsa, aldymen balalarymyz qýanatyn boldy, -deıdi Baǵdabaı Amanov.
Eske sala ketelik, byltyr Atyraýda qaıtarylǵan qarjyǵa salynatyn mektep qurylysy qashan bastalatynyn jazǵan edik.