Atyraýda kondıtsıonerge otyryp alǵan er adam qylmystyq is boıynsha kúdikti bolyp shyqty
ATYRAÝ. KAZINFORM — Áleýmettik jelide Atyraýda er adamnyń kópqabatty úıdiń ekinshi qabatyndaǵy salqyndatqysh qondyrǵysyna otyryp alǵan sáti tarady. Polıtsııa onyń buǵan deıin qylmystyq is boıynsha kúdikti dep tanylǵanyn habarlady.
Oqıǵa 6 qazan kúni keshki ýaqytta bolǵan. Áleýmettik jelide taraǵan vıdeodan 31 jastaǵy jigittiń kópqabatty turǵyn úıdiń ekinshi qabatynda ornalasqan salqyndatqysh qondyrǵysyna otyryp alǵanyn baıqaýǵa bolady. Oqıǵaǵa qatysty Atyraý oblysy polıtsııa departamenti túsinikteme berdi.
Polıtsııanyń málimetinshe, vıdeoda kórsetilgen azamat qyrkúıek aıynda qylmystyq is boıynsha kúdikti dep tanylǵan. Alaıda ol shaqyrtý alǵanyna qaramastan, kelýden jaltarǵan. Qazirgi ýaqytta azamat polıtsııa bólimine jetkizilgen.
— Aıta keteıik, tanysymen bolǵan janjaldan keıin kúdikti ózge de adamdarmen birge oǵan sýyq qarý qoldanyp, dene jaraqatyn salǵan. Sottyń jeke qaýlysyna sáıkes, onyń áreketterine quqyqtyq baǵa berý tapsyrylǵan. Qazirgi ýaqytta tergeý amaldary júrgizilip jatyr, - dep habarlady polıtsııa departamentiniń baspasóz qyzmeti.
Eske salaıyq, buǵan deıin Astanaǵa 3 keli mefedron jetkizbek bolǵan eki adam ustalǵanyn jazǵan edik.
