Atyraýda qaýyrt jelige bir aptada 140 ret qońyraý shalynǵan
ATYRAÝ. KAZINFORM – Atyraý oblysynda qaýyrt jelige sý tasqynyna baılanysty bir aptada 140 ret qońyraý túsken.
Atyraý oblystyq tótenshe jaǵdaılar departamentinde 5 sáýirden beri «Qaýyrt jeli» nómirleri iske qosylǵan. Qaýyr jelige táýlik qońyraý shalýǵa bolady.
«Qaýyrt jeli oblys turǵyndaryna aqparattyq jáne psıhologııalyq kómek kórsetý maqsatyn kózdeıdi. Bir aptada qaýyrt jeli arqyly departamentke 140 qońyraý tústi. Qońyraýdyń deni tabıǵı sıpattaǵy tótenshe jaǵdaıǵa baılanysty bolyp otyr. Atyraý qalasy aýdandarynyń turǵyndary sý tasqyny jóninde naqtylap, jeke múlikterdi qalaı saqtaýdy surady. Turǵyndardyń bir toby materıaldyq kómek týraly bilgisi keledi. Al, júrgizýshiler sý shaıǵan «Dossor-Qulsary» jolynyń búgingi jaǵdaıyna alańdaıdy», - dep habarlady departamenttiń qoǵammen baılanys toby.
Qońyraý shalýshylardy Qulsary qalasyndaǵy jaǵdaı alańdatyp otyr. Olardyń arasynda gýmanıtarlyq kómek kórsetýge qyzyǵýshylyq bildirgender bar.
«Qaýyrt jelige úreılengen turǵyndardan 11 qońyraý tústi. Qońyraý shalýshylarǵa apattar medıtsınasy ortalyǵy jáne jedel qutqarý jasaǵynyń psıhologteri Svetlana Serikbaeva men Aıgúl Qaıyrǵalıeva moraldyq-psıhologııalyq keńes berip otyr. Mundaı keńes qorqynysh pen úreıden arylýǵa, jaǵymsyz psıhıkalyq saldardyń aldyn alýǵa baǵyttalady», -dep málim etti departamenttiń qoǵammen baılanys tobynan.
Eske sala ketelik, budan buryn Atyraýda Bereke, Almaly, Besikti aýyldaryn sý basýy múmkin ekenin jazǵan edik.
