Atyraýda qatarlastaryn baltamen qýalaǵan oqýshyǵa qatysty qylmystyq is qozǵaldy

ATYRAÝ. KAZINFORM – Atyraý oblysy Qulsary qalasyndaǵy mektepterdiń birinde 10 synyp oqýshysy qatarlastarymen bolǵan janjaldan keıin olardy baltamen qýalaǵan. 

Oqıǵa 5 aqpan kúni bolǵan. Saldarynan eki oqýshy jeńil dene jaraqatyn aldy.

– Habarlama túsken boıda oqıǵa ornyna polıtsııa qyzmetkerleri jedel jetip, jasóspirim anyqtalyp, ustaldy. Oqıǵaǵa qatysýshylar men olardyń ata-analary polıtsııa bólimine jetkizildi. Atalǵan derek boıynsha buzaqylyq faktisimen qylmystyq is qozǵaldy. 15 jastaǵy kúdikti ýaqytsha ustaý ızolıatoryna qamalyp, Іshki ister organdarynyń esebine alyndy, - dep málimdedi PD baspasóz qyzmeti.

Jınaqtalǵan materıaldar sheshim qabyldaý úshin kámeletke tolmaǵandardyń isteri jónindegi komıssııaǵa joldanǵan. Sondaı-aq jasóspirimniń ata-anasyna qatysty kámeletke tolmaǵan balany tárbıeleý jónindegi mindetterin tıisinshe oryndamaǵany úshin ákimshilik is qozǵaldy.

– Qylmystyq is aıasynda qylmysqa yqpal etken sebepter men jaǵdaılardy joıý týraly bilim berý bólimine usynys engizildi. Tergeý qorytyndysy boıynsha bilim berý uıymynyń laýazymdy tulǵalarynyń, sondaı-aq oqý ornyn kúzetýdi júzege asyrǵan kúzet agenttigi qyzmetkerleriniń áreketterine quqyqtyq baǵa beriletin bolady, - delingen PD resmı málimdemesinde.

Osyǵan deıin Atyraýda 5 kúnde 370-ke jýyq adam jaýapqa tartylǵanyn jazǵan edik.