Atyraýda kásipkerlikti damytýǵa 9 mlrd teńge bólindi

ASTANA. KAZINFORM — Atyraý oblysynda birinshi jartyjyldyqta shaǵyn jáne orta bıznes óndirgen ónim kólemi 2,4 trln teńgege jetti. Bul oblystyń jalpy óńirlik óniminiń 21%-y. Óńir ákimi Serik Shápkenov shaǵyn jáne orta bızneske kórsetiletin qoldaý sharalary týraly aıtyp berdi. 

Ákimniń aıtýynsha, bıyl oblysta kásipkerlikti damytýǵa 9 mlrd teńgege jýyq qarajat bólindi.

— Qazir jalpy quny 36 mlrd teńgelik 254 kásipkerlik jobaǵa qoldaý kórsetildi, 1725 jańa jumys orny ashyldy. Qoldaý quraldary qatarynda nesıeniń paıyzdyq mólsherlemesin sýbsıdııalaý, kepilsiz nesıege ishinara kepildendirý, qaıtarymsyz memlekettik granttar, sondaı-aq «Órleý» baǵyty arqyly jańa bıznes bastamalardy qoldaý bar, — dedi Serik Shápkenov Ortalyq kommýnıkatsııalar qyzmetinde.

Investjobalardy iske asyrý, shaǵyn jáne orta bıznesti qoldaý sharalary ekonomıkanyń túrli salasynda 26 myńǵa jýyq jańa jumys ornyn ashýǵa múmkindik bergen. Onyń 13 myńnan astamy — turaqty jumys orny.

— Mansap ortalyqtarynyń kómegine júgingen 35 myń adamnyń 15 myńnan astamy jumyspen qamtyldy. Oǵan qosa, 14 myń adamǵa kásibı baǵdar berý aıasynda vaýcherler berildi. Óz kásibin bastaýǵa nıetti turǵyndardy qoldaý maqsatynda 300 azamatqa qaıtarymsyz grant berildi, — dedi oblys ákimi.

Aıta keteıik, Atyraý oblysynda 20 jańa joba iske asyrylyp, 1 300-den asa jumys orny ashylady.

Sondaı-aq, Atyraýda 450 gektarlyq jańa arnaıy ekonomıkalyq aımaq quryldy.