Atyraýda kásipkerdiń banktegi shotyna negizsiz shekteý qoıylǵan

Atyraýda kásipkerdiń banktegi shotyna negizsiz shekteý qoıylǵan, dep habarlaıdy Kazinform.

Sybaılas jemqorlyqqa qarsy is-qımyl agenttiginiń Atyraý oblystyq departamenti baspasóz qyzmetiniń aqparatyna súıensek, qalalyq memlekettik kirister basqarmasynyń laýazymdy tulǵalary jeke kásipkerdiń banktegi shottaryna zańsyz shekteý qoıǵan.

«Kásipker 2017 jyly meıramhana nysanyn salý úshin ekinshi deńgeıdegi bankten 60 mln teńge somasyna nesıe alǵan. Alaıda, ol kiris tappaǵandyqtan, meıramhanany sol baǵaǵa satyp, nesıesin tólegen. Memlekettik kirister bóliminiń qyzmetkerleri kásipkerge satylǵan qunnyń 10 paıyzy, ıaǵnı 6 mln teńge kóleminde salyq tóleý týraly habarlama joldaǵan. Salyq zańnamasyna sáıkes, jeke kásipkerdiń kirisi bolmaǵan jaǵdaıda nóldik kórsetkishi bar kiristi kórsete otyryp, salyq eseptiligin usyný boıynsha mindettemeler ǵana týyndaıdy», -dep málim etti departamenttiń baspasóz qyzmetinen.

Osyǵan baılanysty departament qyzmetkerleri memlekettik kirister departamenti men óńirlik kásipkerler palatasynyń basshylyǵymen kezdesý uıymdastyrdy. Sonyń nátıjesinde kásipkerdiń banktik shotynan shekteýlerdi alyp tastaý jóninde oń sheshim qabyldandy.

Eske sala ketelik, budan buryn Atyraý oblysynda kásipkerler qandaı kedergige jıi tap bolǵanyn habarlaǵan edik.