Atyraýda kásipker balabaqshaǵa kúrishtiń bir kelisin 21 myń teńgege satqan
ATYRAÝ. KAZINFORM — Atyraý oblysynda balabaqshaǵa kúrishtiń bir kelisin 21 myń teńgeden jetkizgen kásipker anyqtaldy. Bul derek áleýmettik mańyzy bar azyq-túlik taýarlarynyń baǵasyna júrgizilgen tsıfrlyq taldaý barysynda belgili boldy. Qazir atalǵan fakti boıynsha tekserý júrgizilip jatyr.
Atyraý oblysy boıynsha ekonomıkalyq tergep-tekserý departamenti basqarmasynyń basshysy Bekbolat Ánesovtyń aıtýynsha, áleýmettik mańyzy bar azyq-túlik taýarlarynyń baǵasyna júrgizilgen tsıfrlyq taldaý nátıjesinde shekti saýda ústemeaqysyn 15 paıyzdan negizsiz asyrǵan 10-nan astam iri ónim jetkizýshi anyqtalǵan.
— Saýda ústemaqysyn 3 500 paıyzdan asyra qoldanyp, qarapaıym kúrishtiń 1 kelisin jeke balabaqshaǵa 21 myń teńgeden jetkizgen. Bul suraq Atyraý oblysy ákimdigi janyndaǵy komıssııada qaraldy. Jýyqta kásipkerge qatysty shara qabyldanady, — dedi Bekbolat Ánesov.
Jarty jyldyqty qorytyndylaǵan departament jyl basynan beri «Kıberbaqylaý» júıesi arqyly onlaın-kazınolar men kóleńkeli oıyn platformalaryna aparatyn 398 ınternet-silteme, sondaı-aq qarjy pıramıdalaryna qatysty 45 ınternet-silteme buǵattalǵanyn da málimdedi.
6 aıda óndiristegi qylmystyq isterdiń 50 paıyzy aıaqtalyp, 12 qylmystyq is sotqa joldanǵan. Aıaqtalǵan ister boıynsha memleketke keltirilgen 109,9 mln teńge shyǵynnyń 21,1 mln teńgesi sotqa deıingi tergep-tekserý barysynda óndirilgen.
Buǵan deıin Atyraýda hırýrg patsıentterden 8 mln teńgeden astam qarajatty zańsyz alǵan degen kúdikke ilingenin jazǵan edik.
