Atyraýda Kaspıı Qubyr Konsortsıýmynyń qoldaýymen «Farıza oqýlary» oblystyq baıqaýy ótti
ATYRAÝ. KAZINFORM - 2024 jylǵy 9 qazanda Atyraýdaǵy Abaı atyndaǵy oqýshylar ortalyǵynda osy óńirde dástúrge aınalǵan aıtýly mádenı-rýhanı is-shara – «Farıza oqýlary» oblystyq baıqaýy ótti.
Oǵan Atyraý oblysynyń aýyldyq jáne aýdandyq jalpy bilim berý mektepteriniń 8-11 synyp oqýshylary qatysty.
«Farıza oqýlary» baıqaýy 2020 jyldan beri jyl saıyn ótkizilip keledi. Atalmysh baıqaý Atyraý oblysynyń týmasy, aqyn, halyq jazýshysy jáne qoǵam qaıratkeri Farıza Ońǵarsynovanyń shyǵarmashylyǵyna arnalǵan.
Ol qazaq ádebıetiniń damýyna súbeli úles qosyp, qazaq poezııasyn úlken belesterge shyǵardy, jastardy ádebı shyǵarmalardy oqýǵa yntalandyrdy. Onyń óleńderi, ocherkteri, áńgimeleri bizdiń elde ǵana emes, sondaı-aq shetelde de tanymal boldy. Kóptegen shyǵarmasy shet tilderine aýdaryldy. Aqyn óleńderine qanshama án jazylyp, jarty ǵasyrdan beri efırde shyrqalyp keledi. Sondyqtan, bul baıqaýdyń maqsaty – óskeleń urpaqtyń shyǵarmashylyq qabiletterin damytý, olardy patrıotızmge jáne týǵan ólkeniń mádenı dástúrlerin qurmetteýge tárbıeleý.
«Kaspıı Qubyr Konsortsıýmy áleýmettik jaýapty kompanııa retinde qashanda qoǵam úshin mańyzdy jobalarǵa qoldaý kórsetedi. Búgin biz «Farıza oqýlary» oblystyq baıqaýyn uıymdastyrýǵa atsalysyp jatyrmyz. Bul is-sharany óńirimizdiń mádenı ómirindegi aıtýly oqıǵa dep esepteımin, óıtkeni baıqaýǵa qatysý arqyly oqýshylardyń mádenı murany saqtaýǵa jáne odan ári damytýǵa qyzyǵýshylyǵy oıanady, jetkinshek býyn rýhanı qundylyqtardy boılaryna sińiredi, shyǵarmashylyqpen aınalysýǵa degen yntalary artady», – dep atap ótti «KQK-Q» AQ bas dırektorynyń QR Úkimetimen baılanys jónindegi orynbasary Qaıyrgeldi Qabyldın.
«Farıza oqýlary» ótkizile bastaǵan 4 jyl ishinde oǵan 200-den astam mektep oqýshysy qatysty. Baıqaýdy Atyraý oblysy Bilim berý basqarmasynyń Talanttardy anyqtaý jáne qoldaý ortalyǵy uıymdastyrady, al «Kaspıı Qubyr Konsortsıýmy-Q» AQ osy is-sharaǵa óziniń medıtsına, mádenıet jáne bilim berý salasyn qoldaýǵa, sondaı-aq Atyraý oblysyndaǵy ınfraqurylymdy damytýǵa baǵyttalǵan qaıyrymdylyq qyzmeti aıasynda qoldaý kórsetip keledi.
Bıyl baıqaýǵa aýdandyq (qalalyq) kezeńderdiń jeńimpazy bolǵan 50-ge jýyq oqýshy qatysty. Ekinshi, ıaǵnı oblystyq kezeńde baıqaýǵa qatysýshylar úsh baǵyt boıynsha óz ónerlerin ortaǵa saldy:
1. «Jyrym qalsyn janymnyń ushqynyndaı» – Farıza Ońǵarsynovanyń óleńderin jatqa, mánerlep oqý saıysy.
2. «Óleń, men seni aıalap ótem...» — Farıza Ońǵarsynovanyń sózine jazylǵan ánderdi oryndaýshylar saıysy.
3. «Farıza shyǵarmalarynan ıllıýstratsııalyq sýretter salý» – Farıza Ońǵarsynovanyń shyǵarmalary taqyrybyndaǵy sýretter saıysy.
Oblystyq baıqaý qorytyndylary boıynsha qatysýshylar árbir atalǵan baǵyttar boıynsha I, II jáne III dárejeli dıplomdarmen, sondaı-aq Talanttardy anyqtaý jáne qoldaý ortalyǵynyń alǵys hattarymen marapattaldy. Biz osy jeńimpazdardyń arasynan Farıza shyǵarmalarynan ıllıýstratsııalyq sýretter salý baǵyty boıynsha birinshi oryndy ıelengen, Inder aýdanyndaǵy Q.Abahanov atyndaǵy orta mekteptiń 10-synybynyń oqýshysy Halıda Ońdasynmen tildesip úlgerdik.
«Úsh jyldan beri sýretshiler úıirmesine qatysyp júrmin. Meni sýret salýǵa jetekshim Janar Muhametjanova úıretip júr. Búǵan deıin eki respýblıkalyq sýretshiler baıqaýyna qatysyp, ekeýinde de úshinshi oryn alǵan edim. Al bul baıqaýǵa qatysý úshin Farıza Ońǵarsynovanyń óleńderin qaıta-qaıta oqydym. Óıtkeni sýretti aqynnyń shyǵarmashylyǵymen baılanystyrý qajet boldy. Baıqaýdyń birinshi júldesin alǵanyma qýanyp turmyn», – deıdi Halıda Ońdasyn.
Jyl saıyn Konsortsıým Qazaqstan Respýblıkasyndaǵy qaıyrymdylyq jobalaryna 3 mln AQSh dollarynan astam qarajat bóledi. Jalpy 2001-2023 jyldar aralyǵynda kompanııa Atyraý oblysy aýmaǵyndaǵy qaıyrymdylyq jobalaryna shamamen 14 mlrd teńge jumsady. Reti kelgende aıta keteıik, KQK qubyr júıesi – TMD aýmaǵynda energetıka salasynda iske asyrylyp jatqan iri jobalardyń biri. Teńiz-Novorossıısk qubyrynyń uzyndyǵy 1 511 kılometrdi quraıdy. Bul baǵdarmen Qazaqstannyń eksportqa shyǵarylatyn munaıynyń úshten ekisinen astamy, sondaı-aq reseılik, sonyń ishinde Kaspııdegi ken oryndarynan alynatyn shıkizat tasymaldanady. KQK teńiz termınaly úsh shyǵarylatyn aılaq qurylǵysymen (ShAQ) jabdyqtalǵan, olar tankerlerge munaıdy jaǵadan aıtarlyqtaı alysta tıeýge múmkindik beredi. Búgingi tańda Kaspıı Qubyr Konsortsıýmynyń birneshe halyqaralyq aktsıoneri bar.
Olardyń úles salmaǵy kelesideı: Reseı federatsııasy - 24%, «KTK Kompanı» HK (JShQ) - 7 %, «Qazmunaıgaz» UK AQ - 19%, Kazakhstan Pipeline Ventures LLC - 1,75%, Chevron Caspian Pipeline Consortium Company – 15%, Lýkoıl Interneshnl Gmbh – 12,5%, Mobil Caspian Pipeline Company – 7,5%, Rosneft-Shell Caspian Ventures Limited – 7,5%, BG Overseas Holdings Limited – 2%, Eni International N.A. N.V. S.ar.l. – 2% jáne Oryx Caspian Pipeline LLC – 1,75%.
