Atyraýda kásibı sadaqshylar bas qosty

ATYRAÝ. KAZINFORM — Jylyoı aýdanynda dástúrli sadaq atýdan respýblıkalyq ashyq týrnır ótti. Tartysty dodaǵa elimizdiń 12 oblysynan, sondaı-aq Reseı men Ózbekstannan kelgen 100-den astam mergen qatysyp jatyr. 

Saıysqa qatysýshylar óz sheberlikterin úsh túrli nysana boıynsha — Pýta, Qalqan jáne Jamby atý túrlerinen synap jatyr.

Іs-sharanyń ashylý saltanatynda aýdan ákimi Jumabek Qarajanov barlyq qatysýshylarǵa sáttilik tilep, týrnırdiń mańyzdylyǵyn atap ótti.

— Ulttyq sport jarysyna elimizdiń ózge óńirlerinen bólek, kórshiles memleketterdiń de sportshylary qatysýda. Mundaı aýqymdy doda aýdanda alǵash ret uıymdastyrylyp otyr. Bul — Jylyoıdyń abyroıyn arttyryp, ulttyq sporttyń halyqaralyq deńgeıde tanylýyna jol ashady, — dedi ákim.

Týrnır eki kúnge jalǵasady. Qatysýshylardyń mergendigimen qatar, olardyń shapshańdyǵy, eptiligi jáne rýhanı tózimdiligi synǵa túsedi.

Jylyoı aýdanynyń mádenıet, tilderdi damytý, dene shynyqtyrý jáne sport bóliminiń basshysy Álibek Naýarov jarystyń basty maqsatyna toqtaldy.

— Bul týrnır ulttyq sport túrlerin dáripteýge, ata-baba dástúrin ulyqtaýǵa jáne jastardyń ulttyq qundylyqtarǵa degen qyzyǵýshylyǵyn arttyrýǵa baǵyttalǵan. Jarystyń jalpy júlde qory — 4 mıllıon 200 myń teńge. Jeńimpazdar men júldegerler arnaıy dıplomdarmen jáne syılyqtarmen marapattalady, — dedi ol.

Aıta keteıik, týrnır barysyn QR Mádenıet jáne sport mınıstrligi bekitken talaptarǵa saı keminde 10 kásibı tóreshi qadaǵalap otyr.

Aıta keteıik, sadaq atýdan Qazaqstan kýbogynyń fınaldyq kezeńinde úzdik mergender synǵa tústi.