Atyraýda qasaqana órtelgen páterden 70 jastaǵy áıeldiń múrdesi tabyldy

ATYRAÝ. KAZINFORM – Atyraýda qasaqana órtelgen páterden 70 jastaǵy áıeldiń múrdesi tabyldy. Marqumnyń 20 jastaǵy uly kúıikpen aýrýhanaǵa tústi. 

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, órt búgin, 25 qyrkúıekte bolǵan.

«Túngi saǵat 03:03-te Atyraý qalasynyń Almagúl shaǵyn aýdanyndaǵy 6 qabatty turǵyn úıdiń 1 qabatyndaǵy páterdiń órtengeni týraly shaqyrtý tústi. Tótenshe jaǵdaılar departamenti qyzmetkerleri avtosatymen jáne baspaldaq arqyly 13 adamdy, onyń ishinde 6 balany evakýatsııalady. Al, 54 adam, onyń ishinde 30 bala ózderi qaýipsiz aýmaqqa shyqty», - dep habarlady departamenttiń qoǵammen baılanys toby. 

Páterdegi órt saǵat 03:44-te tolyqtaı sóndirildi. Órtti sóndirýge tótenshe jaǵdaılar departamentinen 17 qutqarýshy, apattyq medıtsına ortalyǵynan 3 qyzmerker, 5 tehnıka tartylǵan.

«Oqıǵa ornynda 1954 jyly týǵan áıel adamnyń denesi tabyldy. Marqumnyń 1994 jylǵy uly kúıik alyp, aýrýhanaǵa jatqyzyldy. Órttiń aldyn ala sebebi – qasaqana órteý», - dep málim etti departamenttiń qoǵammen baılanys tobynan.

Eske sala ketelik, buǵan deıin Atyraýda er adam men onyń qyzynyń ólimine kináli KamAZ júrgizýshisi 5 jylǵa sottalǵanyn jazǵan bolatynbyz.