Atyraýda qarjy pıramıdasyn qurǵan zeınetkerge sot úkimi shyqty

ATYRAÝ. KAZINFORM – Atyraýlyq zeınetker áıel qarjy pıramıdasyn quryp, 5 jábirlenýshige 4 mln teńge shyǵyn keltirgen. Sot úkimimen onyń bas bostandyǵy 3 jylǵa shekteldi.

Atyraý qalasynyń №2 sotynda adamdar tobynyń aldyn ala sóz baılasýymen qarjylyq pıramıdany quryp jáne oǵan basshylyq etkeni úshin aıyptalǵan (QK-tiń 217-baby 2-bóliginiń 1-tarmaǵy) azamatshaǵa qatysty qylmystyq is qaraldy.

«Sottalýshy adamdar tobynyń (qylmystyq istiń is júrgizýi bólektetilgen tulǵamen) aldyn ala sóz baılasýymen qarjy pıramıdasynyń qurylymdyq bólimshesin qurǵan. Salymshylardy tartý maqsatynda keńseni jalǵa alyp, onda kún saıyn úgit-nasıhat júrgizip, jarnamalyq bannerler ilgen. Osylaısha, kásipkerlikke qarajat tartpaı, basqalardyń jarnalary esebinen keıbir qatysýshylardy baıytý jolymen osy aktıvterdi tartýdan múliktik paıda alý boıynsha qyzmetti uıymdastyryp, basqarǵany anyqtaldy», - dep habarlady oblystyq sottyń baspasóz qyzmeti.

Sottalýshynyń qylmystyq áreketinen 5 jábirlenýshige 4 mln teńgeden astam shyǵyn keltirilgen. Sottalýshy kinásin tolyq moıyndap, jábirlenýshilermen tatýlasýyna baılanysty ózin qylmystyq jaýaptylyqtan bosatýdy surady. Jábirlenýshiler sottalýshyny qylmystyq jaýaptylyqtan bosatyp, qylmystyq isti toqtatýdy usyndy.

«Qylmystyq jaýaptylyq pen jazany jeńildetetin mán-jaılar retinde sottalýshynyń zeınetkerlik jasy, jábirlenýshilerge keltirilgen zalaldy óz erkimen tolyqtaı ótegeni eskerildi. Jazany aýyrlatatyn mán-jaılar anyqtalmady. Sottalýshy QR Qylmystyq kodeksiniń 217-babynyń 2-bóliginiń 1-tarmaǵymen kináli dep tanyldy. Oǵan belgili bir qyzmetpen aınalysý quqyǵyn 3 jyl merzimge, bas bostandyǵyn 3 jyl merzimge shekteý túrindegi jaza taǵaıyndaldy», - dep málim etti sottyń baspasóz qyzmetinen.

Sot úkimi zańdy kúshine engen joq.

Eske sala ketelik, budan buryn Atyraýda seriktestik dırektorynan 6 mln teńge para alǵan sheneýnik 4 jylǵa sottalǵanyn  habarlaǵan edik.