Qarjy pıramıdasyn qurǵan atyraýlyq qarııa jazasyn shartty túrde óteıdi
Atyraýda qarjy pıramıdasyn qurǵan adam 5 jylǵa sottaldy. Zeınet jasyndaǵy sottalýshy jazasyn shartty túrde óteıdi, dep habarlaıdy Kazinform.
Oblystyq sottyń baspasóz qyzmetinen málim etkendeı, asa iri mólsherde aqsha tartyp, qarjy pıramıdasyn qurǵan, oǵan basshylyq jasaǵan adamǵa QR Qylmystyq kodekstiń 217-babynyń 3-bóliginiń 2-tarmaǵymen aıyp taǵylǵan.
«Sottalýshy T. Reseı Federatsııasynyń azamaty D-nyń „The Finiko“ kompanııasyn qurǵanyn bilip, bir top adammen aldyn ala sóz baılasyp, oǵan qosylýǵa jáne kompanııa atynan áreket jasaýǵa sheshim qabyldaǵan. Óziniń qylmystyq josparyn júzege asyrý maqsatynda áreketiniń zańsyzdyǵyn bile tura aqparattyq mehanızmdi iske qosqan. Áleýmettik jeli arqyly ózine jaqyn adamdar arasynan kompanııaǵa salymshylardy tartýǵa baǵyttalǵan áreketin júzege asyrǵan. Ol Qazaqstan Respýblıkasynyń aýmaǵynda „The Finiko“ kompanııasynyń halyqpen jumys isteý tájirıbesi bar ekenine kóz jetkizip, kompanııanyń qurylymdyq bólimshesin basqarýǵa sheshim qabyldaǵan», — dep habarlady sottyń baspasóz qyzmeti.
Sottalýshy kompanııaǵa 19 jábirlenýshini tartqan.
Jábirlenýshilerge 108 mln teńgeden asqan qarjylyq zalal keltirgen.
Alaıda, kúdikti tergeý satysynda 93 mln teńge zalaldyń ornyn toltyrǵan. Ótelmegen zalal somasy — shamamen 15 mln teńge.
Sottalýshynyń kinási jábirlenýshilerdiń, kýálardyń aıǵaqtarymen, ekonomıkalyq saraptama qorytyndysymen, maman qorytyndysymen, foto jáne beınematerıaldarmen tolyq dáleldengen.
Prokýror sottalýshyny 6 jylǵa bas bostandyǵynan aıyrýdy surady.
Sottalýshy áreketinde qylmys quramy bolmaýyna baılanysty ózin aqtaýdy ótingen.
Al, 18 jábirlenýshi kelgen zalaldyń ótelýine baılanysty sottalýshyǵa bas bostandyǵynan aıyrmaıtyn jaza taǵaıyndaýdy usyndy.
«Sot úkimimen T. kináli dep tanylyp, oǵan qarjylyq, kommertsııalyq jáne kommertsııalyq emes uıymdarda basshylyq laýazym atqarý quqyǵynan 7 jylǵa, 5 jyl merzimge bas bostandyǵynan aıyrý jazasy taǵaıyndaldy. Sottalýshynyń zeınet jasynda ekenin jáne zalaldyń ishinara ótelgenin eskerip, sot Qylmystyq kodekstiń 63-babyn qoldanyp, jazany shartty túrde taǵaıyndady», — dep málim etti sottyń baspasóz qyzmetinen.
Sot úkimi zańdy kúshine engen joq.
