Atyraýda qarjy máselesi qalaı sheshilmek
ATYRAÝ. KAZINFORM — Atyraý oblysynyń 2026 jylǵy bıýdjeti 1,2 trln teńgege jýyqtaıdy. Ózge óńirlerdegideı qarjy máselesi munaıly astana da bar. Qazir aımaqta birneshe iri nysan qatar salynyp jatsa, memlekettik saraptamadan ótken, jalpy quny 200 mlrd teńgeden asatyn taǵy birqatar joba qarjy men kezegin kútip tur.
Oblys ákimdiginiń resmı aqparatyna súıensek, Atyraý oblysynyń bıýdjeti 2026 jyly — 1 trln 191,4 mlrd teńge. Bıýdjettiń trıllıon teńgeden asqany óńirdiń qarjylyq múmkindigi sheksiz degendi bildirmeıdi. Sebebi onyń 666,9 mlrd teńgesi aǵymdaǵy shyǵystarǵa baǵyttalǵan. Damý bıýdjetine 262,1 mlrd teńge qarastyrylǵan. Budan bólek, 262,4 mlrd teńge respýblıkalyq bıýdjetke alynatyn qarajat retinde kórsetilgen.
Qazir oblysta bir ýaqytta ondaǵan áleýmettik jáne ınfraqurylymdyq joba iske asyrylyp jatyr. Olardyń arasynda onkologııalyq dıspanser, jedel medıtsınalyq járdem stantsııasy, «Órken» jáne «Nursaıa» shaǵynaýdandaryndaǵy emhanalar, 1200 oryndyq kontsert zaly, Beıbitshilik pen kelisim saraıy, «Munaıshy» stadıony, «Taısoıǵan–Mııaly» magıstraldyq sý qubyry jáne káriz-tazartý qurylystary bar.
Birneshe iri jobanyń qatar júrýi olardyń barlyǵyn belgilengen merzimde aıaqtaýǵa qatysty suraq týǵyzady. Ákimdiktiń ózi de nysandardyń basym bóligi birneshe jylǵa eseptelgenin jáne qarjylandyrýdyń kezeń-kezeńimen júrgiziletinin habarlaǵan. Mysaly, «Órken» jáne «Nursaıa» shaǵynaýdandaryndaǵy eki emhana bıyl aıaqtalýǵa tıis. Al 1200 oryndyq kontsert zaly birneshe jylǵa josparlanǵan aýyspaly joba retinde qarjylandyrylmaq.
Buǵan deıin halyq 15 jyl kútken kontsert zalynyń qurylysyna jaýapty merdiger ókili qarjylandyrý máselesi sheshilmese, qurylys toqtap qalý qaýpin baryn jasyrmaǵan edi. Sol kezde ákimdik ókilderi bıyl 30 mlrd teńgege jýyq qarjy suralǵanyn, alaıda bólinbegenin aıtty.
Qarjy máselesi tek jańa qurylystarǵa ǵana qatysty emes. Mysaly, bıyl Atyraý oblysynda 9 bilim berý uıymyn renovatsııa arqyly jańartý josparlanǵan. Alaıda qazir qarjy tek úsh nysanǵa bólingen. Oblystyq bilim berý basqarmasynyń basshysy Marat Ábýov qalǵan alty mektepte jóndeý jumysy bıýdjet qarajatynyń tapshylyǵyna baılanysty bastalmaı otyrǵanyn málimdedi.
Bastalǵan jobalarǵa qatysty bıýdjet tapshylyǵy máselesine qatysty ákimdik naqty jaýap bermedi.
Ákimdik qazirgi ýaqytta jobalyq-smetalyq qujattamasy ázirlenip, memlekettik saraptamadan oń qorytyndy alǵan jobalardyń jalpy quny 200 mlrd teńgeden asatynyn habarlady. Biraq olardyń iske asý merzimi naqty belgilenbegen. Sheshim jobanyń basymdyǵyna, áleýmettik mańyzdylyǵyna, daıyndyq deńgeıine jáne bıýdjet múmkindigine qaraı qabyldanady.
— Óńirde qazirdiń ózinde iske asyrylyp jatqan joba kóp bolǵandyqtan, negizgi basymdyq bastalǵandaryn aıaqtaýǵa jáne halyq úshin asa qajet áleýmettik ári ınjenerlik — ınfraqurylymdyq jobalardy júzege asyrýǵa beriledi. Qalǵan daıyn jobalardy aldaǵy jyldary kezeń-kezeńimen iske asyrý josparlanyp otyr. Sonymen qatar oblys ákimdigi qosymsha qarjylandyrý kózderin, onyń ishinde respýblıkalyq bıýdjet qarajatyn tartý boıynsha jumystanyp jatyr, — delingen ákimdiktiń jaýabynda.
Atyraý oblysynyń 2026 jylǵy bıýdjeti syrt kózge qomaqty kórinedi. Alaıda naqty esepke kelgende, onyń edáýir bóligi aǵymdaǵy shyǵystarǵa jumsalady. Al damý bıýdjeti 262,1 mlrd teńge kóleminde qalyp otyr. Osy qarjyǵa qazirdiń ózinde salynyp jatqan iri nysandardy aıaqtaý kerek. Sonymen birge jol, sý, káriz jáne áleýmettik ınfraqurylym baǵyttaryndaǵy jańa jobalar da qarjylandyrýdy kútip tur.
Buǵan deıin óńirge oqýshylardy tasymaldaýǵa 28 avtobýs jetispeıtinin jazǵan edik.
