Atyraýda káriz jelisin salýǵa arnalǵan 23 jobaǵa 80 mlrd teńge qajet
ATYRAÝ.KAZINFORM — Atyraý qalasyndaǵy turǵyn úı sektorlaryn ortalyqtandyrǵan káriz júıesimen qamtý úshin 390 shaqyrymdaı jeli júrgizilý kerek. 20-dan astam yqshamaýdanǵa arnalǵan 23 jobany iske asyrýǵa shamamen 80 mlrd teńge kerek. Bul týraly Atyraý qalasy ákiminiń orynbasary Tilek Mahýov aıtty.
Atyraý bıligi Jaıyq ózeniniń oń jáne sol jaq jaǵalaýynda ornalasqan yqshamaýdandardy ortalyqtandyrǵan káriz júıesin qosýǵa baǵyttalǵan jobalar aıasynda 50-den asa kárizdik sorǵy stantsııa salynatynyn málimdedi. Ótken jyly Juldyz-1, Juldyz-2, Geolog jáne Mıras shaǵyn aýdandaryna 92 shaqyrym jeli salý jumysy bastalǵan edi. Tilek Mahýovtyń sózinshe, bul jumys aıaqtalýǵa jaqyn.
Ekinshi kezeń boıynsha Saryqamys, Balaýsa yqsham aýdandaryna jeli tartý jumysynyń jobasy aıaqtalyp jatyr. Qarjy bólingen jaǵdaıda bul aýmaqtarda jumys bıyl bastalmaq. Birneshe jyldan beri jer úıde turatyn qala halqyn búginde salynyp jatqan qubyrdyń dıametri alańdatady. Jobaǵa dıametri 100-dik qubyr da paıdalanylyp jatyr. Turǵyndar aldaǵy ýaqytta júıe bitelip, másele týyndaýy múmkin dep otyr. Degenmen ákimdik jobanyń memlekettik saraptamadan ótkenin, júıelerdiń boıyna sorǵylar qoıylatyndyqtan problema bolmaıdy deıdi.
— Joba memlekettik saraptamadan ótken. Munyń barlyǵy eseppen shyqqan jobalar. Jelilerdiń boıynda birneshe sorǵy bolady. Qubyr boıy bitelmeıdi. Sorǵylardyń kúshi jetedi, — dep pikir bildirdi qala ákiminiń orynbasary Tilek Mahýov.
Jaıyq ózeniniń sol jaq jaǵalaýynda ornalasqan Juldyz-1, Juldyz-2, Aqsaı, Aqjar syndy eldimekenderge júrgiziletin jeliler Talqaırań yqshamaýdanynda salynyp jatqan dıametri 400-500 mm-lik negizgi káriz jelisine qosylady. Al Saryqamys yqshamaýdanyna júrgiziletin jeli Leshozdaǵy káriz sorǵy stantsııasymen baılanystyrylady.
Sheneýnikter barlyq jobany iske asyrýǵa qajetti qomaqty qarjynyń bir jylda bólý múmkin emes ekenin, jumys bekitilgen jospar boıynsha kezeń-kezeńimen iske asatynyn aıtty. Kem degende 4-5 jyl ýaqyt kerek deıdi qala basshylyǵy.
Búginde Atyraý qalasy boıynsha qoldanysta 300 shaqyrymǵa jýyq káriz jelisi bar. 80-ge jýyq káriz sorǵy stantsııa jumys isteıdi. Onyń 45-i jańǵyrtý men jóndeýdi qajet etedi. Byltyr jeteýi jańartylsa, bıyl mundaı jumys 7 stansada júrip jatyr.
— Káriz jelilerin sanatsııa ádisimen tazalaý jumystaryn júrgizip jatyrmyz. 3 kezeń 33 shaqyrymdy qamtıdy. Bul jumys nátıje berip jatyr. Jospar boıynsha istelý kerek jumystyń 45 paıyzy aıaqtaldy, — dep tolyqtyrdy Atyraý qalasy ákiminiń orynbasary Tilek Mahýov.
Buǵan deıin Atyraý qalasyndaǵy «Mıras», «Juldyz-2», «Saryqamys», «Jumysker», «Órken», «Kóktem» sekildi birneshe yqsham aýdan turǵyndary ondaǵan jyl boıy jerasty sýynyń zardabyn shegip otyrǵanyn jazǵan edik.
Jańbyr men qar jaýǵannan keıin jerasty sýy kóterilip, jer betine shyǵyp, halyqty ábigerge salady. Saldarynan jer úılerdiń irgetasy otyryp, qabyrǵalarda jaryq paıda bolǵan. Osylaısha, turǵyn úılerge qaýip tónip otyr.
