Atyraýda káriz-tazartý keshenindegi sarqyndy sýdan munaı qaldyqtary tabyldy
ATYRAÝ. KAZINFORM – Jaıyq ózeniniń sol jaǵalaýyndaǵy káriz-tazartý keshenindegi sýdan munaı ónimderiniń qaldyqtary tabylǵan. Búginde stantsııanyń jumysyna «Atyraý oblysy Sý Arnasy» KMK jaýapty.
Atalǵan mekemeniń redaktsııaǵa bergen jaýabyna súıensek, stantsııada 27-shi qyrkúıekten bastap aerotenktiń betinde maı plenkasy paıda bolǵan jáne aýmaqtan munaı qaldyqtarynyń ıisi baıqalǵan.
– Qazirgi tańda oblystyq tabıǵat qorǵaý prokýratýrasy men ekologııa departmentine hat joldandy. Tekseris barysynda bizdiń qyzmetkerler stantsııa aýmaǵyndaǵy aýadan kómirtegi totyǵy men kúkirt sýtegisi shektik normadan birneshe eskenin anyqtady. Naqtyraq aıtqanda, kómirtegi totyǵynyń kólemi 976 mg/m3 bolǵan, al norma boıynsha 20mg/m3-dan aspaý kerek. Kúkirt sýtegisi – 195 mg/m3-ty qurady. Shektik mólsher – 10mg/m3. Munaı qaldyqtaryn júıeden tazalaý ýaqyty bir aıdan úsh aıǵa deıin sozylady. Sol jaǵalaýdaǵy káriz tazartý stantsııasynda munaı qaldyqtaryn tazalaý tehnologııasy qarastyrylmaǵan. Sebebi, keshen turmystyq káriz sýyna arnalǵan, - delingen «Atyraý oblysy Sý Arnasy» KMM-nyń jaýabynda.
Atyraý oblystyq ekologııa departamenti 3 qazan kúni «Kazgıdromed» RMK AOF mamandary káriz sýyn tazartý stantsııasyndaǵy sýdan synama alǵanyn habarlady.
– «Qazgıdromet» RMK Atyraý fılıalynyń mamandary hımııalyq taldaý júrgizý úshin munaı ónimderiniń mólsherin anyqtaý maqsatynda 3 jerden synama aldy. Synaq hattamasyna sáıkes sý synamalarynda munaı ónimderiniń mólsheri 0,005 mg/dm³-ten tómen. Munyń shekti normadan asqanyn nemese aspaıtynyn anyqtaý maqsatynda zerdeleý jumystary júrip jatyr, - dedi Atyraý oblystyq ekologııa departamentiniń bas mamany Ardaq Ýralova.
Eske sala keteıik, biz buǵan deıin AMÓZ-de jóndeý jumystarynyń bastalǵanyn habarlaǵan edik.