Atyraýda kartop 1 adamǵa 3 keliden satylyp jatyr
ATYRAÝ. KAZINFORM – Atyraýda turaqtandyrý qorynyń kartoby 1 adamǵa 3 keliden artyq satpaý jóninde shekteý engizildi.
Bul derekti «Atyraý» áleýmettik-kásipkerlik korporatsııasy» AQ-nyń baspasóz qyzmeti rastady.
– Atyraý oblysynyń 2024-2025 jyldarǵa arnalǵan turaqtandyrý qory baǵdarlamasy iske asyrylyp jatyr. Baǵdarlamaǵa sáıkes áleýmettik mańyzy bar azyq-túlikterdiń baǵasyn turaqtandyrý maqsatynda jergilikti aýyl sharýashylyǵy ónimin óndirýshilerge aınalym qarjysyn tolyqtyrý úshin qaıtarymdy qaryz berildi. Turaqtandyrý qoryna 5 667 tonna kókinis ónimi jetkizildi. Shartqa sáıkes áleýmettik mańyzy bar kókónis ónimderi 2024 jyldyń 1 qarashasy men bıylǵy jyldyń naýryzyna deıin 11 sýpermarkette, Atyraý qalasyndaǵy 3 bazar men 6 saýda pavılonynda satylyp jatyr. Qazir turaqtandyrý qorynyń qoımasynda 200 tonna kartop qory bar. Bul aqpan aıynynyń sońyna deıin jetedi. Saýda oryndarynda kartoptyń baǵasy – 180 teńge, - dep habarlady baspasóz qyzmeti.
«Atyraý» ÁKK» AQ kóktemgi kezeńge 680 tonna aýyl sharýashylyǵy taýarlaryn jetkizýdi kózdep otyr. Osy maqsatta jergilikti aýyl sharýashylyǵy taýaryn óndirýshimen qosymsha shart jasalǵan.
– Turaqtandyrý qoryndaǵy kartop naryqtaǵy qunynan áldeqaıda tómen baǵamen satylyp jatyr. Alaıda arzan kartopty kóp mólsherde alyp, ústeme baǵamen satýǵa jol bermeý úshin 1 adamǵa 3 keliden satýǵa sheshim qabyldandy. Bul – alypsatarlyq áreketti boldyrmaý úshin jasalǵan qadam, - dep málim etti baspasóz qyzmetinen.
Eske sala ketelik, buǵan deıin Atyraýda baǵany negizsiz ósirgen kásipkerlerge 2,8 mln teńge aıyppul salynǵanyn jazǵan bolatynbyz.