Atyraýda qaraýsyz qalǵan 140-tan astam ǵımarat anyqtaldy
ATYRAÝ. KAZINFORM — Atyraýda 140-tan astam qaraýsyz qalǵan ǵımarat anyqtaldy. Búginde onyń 75-i buzylǵan.
Bul jumys «Zań men tártip» qaǵıdaty aıasyndaǵy «Aıqyn nátıje» jobasy boıynsha júrgizilip jatyr. Joba úsh baǵytty qamtıdy. Olar — qaraýsyz qalǵan ǵımarattardy súrtý, beınebaqylaý kameralary joq aýmaqtardy anyqtaý jáne kóshelerdi jaryqtandyrý. Qala prokýrory Mergen Meńdiǵalıevtiń aıtýynsha, ıesiz ǵımarattardyń keıbiri ishimdik ishetin jáne turaqty baspanasy joq adamdardyń panalaıtyn ornyna aınalǵan.
— Mundaı ǵımarattardy buzý turǵyndardyń qaýipsizdigin qamtamasyz etýmen qatar, qalanyń sáýlettik kelbetin jaqsartýǵa da baǵyttalǵan, — dedi ol.
Qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń basshy orynbasary Oljas Hasanovtyń málimdeýinshe, ǵımarattardaǵy turǵyndardyń barlyǵy kóshirilgen. Bosaǵan aýmaqtardyń bir bóligine aldaǵy ýaqytta jańa turǵyn úıler men saýda nysandaryn salý kózdelip otyr.
Buǵan deıin Atyraý qalasynda jyl sońyna deıin 100-den astam jeke turǵyn úı men apatty jaǵdaıdaǵy 8 kóppáterli úı buzý josparlanyp otyrǵan jóninde jazǵan edik.
