Atyraýda qarasha aıy bastalǵaly beri 8 esirtki qylmysy tirkelgen

Atyraýda qarasha aıy bastalǵaly esirtki qylmysymen baılanysty 8 derek tirkelgen. Qazir 8 kúdiktige qatysty qylmystyq isti tergeý júrip jatyr, dep habarlaıdy Kazinform.

Atyraý oblystyq polıtsııa departamenti tergeý basqarmasy bastyǵynyń orynbasary, polıtsııa podpolkovnıgi Arsen Imanálıevtyń aıtýynsha, áleýmettik jelide keıbir kúdiktilerdiń jaýapkershilikke tartylmaǵany týraly aqparat taraǵan.

«Qarasha aıy bastalǵaly Atyraý oblystyq polıtsııa departamentiniń qyzmetkerleri esirtki qylmysymen baılanysty 8 quqyq buzýshylyqty anyqtady. Qazir 8 kúdiktige qatysty qylmystyq is tirkeldi. Zań sheńberinde kúdiktiler jaýapkershilikke tartylady. Kúdiktilerge qatysty QR Qylmystyq kodeksiniń 296 jáne 297-babymen sotqa deıingi tergeý amaldary júrgizilip jatyr», - dep málim etti Arsen Imanálıev.

Onyń aıtýyna qaraǵanda, ózge aqparat QR Qylmystyq-protsesstik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraýda esirtki jasyryp, satýmen aınalysqan eki kúdikti ustalǵanyn jazǵan bolatynbyz.

Esirtkini jasyrýmen, satýmen aınalysqan eki kúdikti ustaldy. Kúdiktiniń biri – 18, ekinshisi – 17 jasta. Polıtsııa qyzmetkerleri ustalǵan kúdiktilerge qatysty QR Qylmystyq kodekstiń 297-babynyń 3-bóligimen sotqa deıingi tergep-tekserýdi bastady. Kúdiktiniń biri – 2005 jylǵy jigit QR Qylmystyq-protsestik kodeksiniń 128-babyna sáıkes qamaýǵa alyndy.

Sondaı-aq, atyraýlyq turǵynnan bekire, atys qarýy, marıhýana tárkilengenin habarlaǵan edik.

Kúdiktiniń turǵylyqty meken-jaıyn tekserý kezinde áseri joǵary 996 dana psıhotropty dáriler, 29 dana bekire tuqymdas balyq túri, ishki ister organdarynda tirkelmegen atys qarýy men polıetılen paketke salynǵan ótkir ıisi bar ósimdik tárkilendi. Saraptama qorytyndysymen ósimdiktiń keptirilgen marıhýana ekeni dáleldendi.