Atyraýda qańtar bastalǵaly 7 kólik órtenip ketken

ATYRAÝ. KAZINFORM – Atyraý oblysynda qańtar aıy bastalǵaly 7 kólikti jalyn sharpydy. Onyń 3-eýi sońǵy aptada órtengen.

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, byltyr 89 kólik órtengeni tirkelgen. 

– Avtokólikterdegi órt tez órshıdi. Bul júrgizýshiler men jolaýshylarǵa úlken qaýip tóndiredi. Órttiń aldyn alý úshin kólikti der kezinde tehnıkalyq baıqaýdan ótkizý qajet. Kóliktiń tehnıkalyq jaǵdaıyn únemi qadaǵalap, ásirese elektr symdaryna nazar aýdarǵan jón. Órt sóndirý quraly men qum qoljetimdi tusta bolýy kerek. Sýyq mezgilde avtokólikte ornatylǵan jáne qozǵaltqyshty jylytý úshin paıdalanatyn elektr jylytqyshtary qaýipti ekenin eskertemiz, dep málim etti departamenttiń ımıdjdik jumys jáne syrtqy kommýnıkatsııalar tobynan.

Eske sala ketelik, buǵan deıin Atyraý oblysynda byltyr órtten 12 adam mert bolyp, taǵy 12-si zardap shekkenin jazǵan bolatynbyz.