Atyraýda qamys órtine baılanysty tótenshe jaǵdaı jarııalaýǵa negiz joq – Shápkenov

ATYRAÝ. KAZINFORM – Atyraý oblysynyń ákimi Serik Shápkenov «Aqjaıyq» tabıǵı rezervatyndaǵy qamys órtine baılanysty tótenshe jaǵdaı jarııalanbaıtynyn málim etti.  

Ákimniń pikirinshe, tótenshe jaǵdaı jarııalaý úshin arnaıy krıterıı bar. Soǵan baılanysty dál qazir tótenshe jaǵdaı jarııalaýǵa negiz joq.

– Aldymen tótenshe jaǵdaı jarııalaý bizge ne beredi? Ony jarııalaý úshin quqyqtyq, zańdyq normalar negizge alynady. Sol sáıkes bolsa ǵana tótenshe jaǵdaı jarııalanady. Qazir qamys órtine baılanysty tótenshe jaǵdaı jarııalaýǵa negiz joq. Nege? Birinshiden, bizde órtti sóndirýge kúsh quraldary da, adamı resýrs ta jetkilikti. Ekinshiden, tótenshe jaǵdaı jarııalaıtyndaı krıterııge jete qoıǵan joq, - deıdi Serik Shápkenov.

«Aqjaıyq» tabıǵı rezervatyndaǵy qamys órti 13 maýsymda túski mezgilde tutanǵan. Sodan beri 1515 gektardy jalyn sharpyǵan. 

Eske sala ketelik, 18 maýsymnan beri «Aqjaıyq» rezervatyndaǵy ahýal baqylaý munaralarynan tikeleı kórsetilip jatyr. 

Al keshe «Aqjaıyq» tabıǵı rezervatyndaǵy órtke adam faktorynyń áseri bolýy múmkin ekenin habarlaǵan edik.

Sondaı-aq «Aqjaıyq» rezervatyndaǵy órtti sóndirýge taǵy bir tikushaq tartyldy.