Atyraýda qamys órti 10 saǵattan beri sóndirilip jatyr
ATYRAÝ. KAZINFORM — Atyraý oblysynyń Qyzylqoǵa aýdanynda 10 saǵat buryn bastalǵan qamys órti áli sóndirilip jatyr. Aldyn ala málimet boıynsha, órt aýmaǵy 7 gektardy quraıdy.
18 qazanda saǵat 23:27–de Qyzylqoǵa aýdany Qarabaý aýylynan shamamen 13 shaqyrym qashyqtyqtaǵy ashyq aýmaqta qamys órtengen.
Qazirgi ýaqytta órttiń 5 gektary sóndirildi. Qyzyl jalyndy aýyzdyqtaýǵa 34 adam men 5 tehnıka jumyldyrylǵan. Onyń ishinde traktor, júk tıegish jáne órt sóndirý modýli bar.
— Zardap shekkender joq. Eldi mekenderge qaýip tónip turǵan joq. Órtti sóndirý jumysy jalǵasýda, — dep habarlady TJD baspasóz qyzmeti.
Aıta keteıik, elimizde jyl saıyn 18 myńnan astam tabıǵı jáne tehnogendik tótenshe jaǵdaı tirkeledi. Onyń shamamen 12 myńy — órt.
