Atyraýda kámeletke tolmaǵan qyzdy zorlaýǵa oqtalǵan kúdikti 17 jylǵa sottaldy

Atyraýda kámeletke tolmaǵan jasóspirimdi zorlaýǵa oqtalǵan kúdiktige qatysty sot úkimi shyqtty. Ol 17 jylǵa sottaldy, dep habarlaıdy Kazinform.

Atyraý oblysynyń qylmystyq ister jónindegi mamandandyrylǵan aýdanaralyq sotynda qaraldy. Sottalýshyǵa QR Qylmystyq kodeksiniń 24-babynyń 3-bóligi, 120-babynyń 4-bóligi jáne 200-babynyń 3-bóligimen aıyp taǵylǵan.

Qylmystyq is jabyq sot otyrysynda qaralǵandyqtan, zańǵa sáıkes istiń mán-jaıy jarııa etilgen joq. Sottalýshy I.-dyń kinási kámeletke tolmaǵan jábirlenýshi men onyń zańdy ókiliniń, kýágerdiń aıǵaqtarymen, oqıǵa bolǵan jerdi qaraý aktisimen, saraptamalyq qorytyndylarmen tolyq dáleldendi.

Prokýror I.-dy 17 jyl merzimge bas bostandyǵynan aıyrýdy surady. Jábirlenýshiniń zańdy ókili prokýrordyń ustanymyn qoldap, sottalýshyǵa qatań jaza taǵaıyndaýdy surady. Al, Sottalýshy I., kinásin moıyndady.

«Jazany taǵaıyndaý kezinde sot jasalǵan qylmystyń sıpaty men qoǵamǵa qaýiptilik dárejesin, sottalýshynyń minez-qulqyn, jazany jeńildetetin jáne aýyrlatatyn mán-jaılardy eskerdi. Sot úkimimen sottalýshy I.-ǵa pedagogıkalyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıyna, bas bostandyǵynan 17 jyl merzimge aıyrý jazasy taǵaıyndaldy», - dep habarlady sottyń baspasóz qyzmeti.

Sottyń úkimi zańdy kúshine endi.

Eske sala ketelik, budan buryn Atyraý turǵyny 13 jasar qyzdy zorlamaq boldy degen kúdikpen ustalǵanyn habarlaǵan bolatynbyz.

Keıin Atyraýda 13 jastaǵy qyzdy zorlamaq bolǵan kúdiktige qatysty jańa derekter aıtylǵanyn  jazǵan edik.