Atyraýda taǵdyry qıyn 200-ge jýyq kámeletke tolmaǵan bala bar
Bıyl Atyraý qalasy ákiminiń janyndaǵy kámeletke tolmaǵandardyń isteri jónindegi komıssııada 200-ge jýyq balanyń máselesine taldaý júrgizilgen. Jasóspirimderdiń arasynda quqyq buzýshylar da, ata-anasynan meıirim kórmegender men panasyz qalǵandar bar, dep habarlaıdy Kazinform.
Qala ákiminiń orynbasary, komıssııa tóraǵasy Nurjan Ermuhanovtyń aıtýynsha, aı saıyn eki márte otyrys ótkizilgen. Komıssııada ár balanyń taǵdyry jete zerttelip, zań aıasynda sheshim qabyldanǵan.
«Ár komıssııanyń ustanatyn baǵyty bar. Kámeletke tolmaǵandardyń isteri jónindegi komıssııanyń basty mindeti – balalar arasyndaǵy quqyq buzýshylyqtyń aldyn alý, olardyń quqyǵy men zańdy múddesin qorǵaý. Alaıda, komıssııa otyrysynda máselesi qaralǵan 200-ge jýyqy balanyń keıbiriniń taǵdyry erekshe tolǵandyrady. Óıtkeni, balalardyń biri quqyqqa qarsy áreketke barsa, ózgesi ata-anasynyń meıirimin sezine almaǵan. Tipti, panasyz qalyp, jáýteńdegen balanyń aıanyshty taǵdyry oılantady», - deıdi Nurjan Ermuhanov.
Onyń aıtýynsha, komıssııanyń qaraýyna usynylǵan basty máseleniń biri – ata-analardyń bala tárbıesindegi jaýapkershiligi. Óıtkeni, ata-analardyń tarapynan balalaryn mektepke sebepsiz jibermeı, sóıtip, bilim alý quqyǵyn shekteıtinder bar. Keıbir ata-ana alkogoldi ishimdikke táýeldi bolǵan.
«Osyndaı nemquraıly kózqarastan balalar óz úıinde qamqorlyqty sezine almaı, kerisinshe zábir kóredi. Tipti, soqqynyń qurbanyna aınalyp jatatyn jaıt jıi kezdesedi. Qatygez áke es-tússiz mas kúıinde toǵyz aılyq qyzynyń qolyn syndyrǵan. Balalarynyń anasyn dalaǵa qýyp jibergen. Bul – alańdatatyn jaıt», - deıdi qala ákiminiń orynbasary.
Qalalyq polıtsııa basqarmasynyń qyzmetkerlerimen birge bala tárbıesine baılanysty mindetin oryndamaıtyn ata-analarǵa túsindirý jumysy júrgizilgen. Alaıda, zańǵa sáıkes tıisti sharasy alynǵanymen, odan nátıje shyǵarmaıtyndar bar. Sol sebepten, komıssııa otyrysynda ata-ana quqyǵynan shekteý máselesi kóp qaralǵan.
«Árıne, ana men balany bir-birinen aıyrý ońaı emes. Biraq, balanyń quqyǵyn qorǵaý, qaýipsizdigin qamtamasyz etý úshin naqty qadamǵa barýǵa týra keledi. Óıtkeni, balalardy túrli oqys jaǵdaıdan qorǵaý, onyń ishinde sýıtsıdtiń aldyn alý úshin osyndaı sheshim qabyldandy. Maqsat – balalardy meıirimsiz ata-ananyń qolynda qaldyrmaı, memleket qaraýyna alý», - dep túsindirdi Nurjan Ermuhanov.
Ákim orynbasarynyń aıtýyna qaraǵanda, komıssııada turmysy tómen otbasylarǵa áleýmettik qoldaý kórsetý máselesi de talqylanady. Komıssııa músheleri baqylaýda turǵan otbasylardyń turǵylyqty mekenjaıyna baryp, balalardyń jaǵdaıymen jete tanysqan. Sodan keıin 40-tan astam otbasy turmysqa qajetti zattarmen, azyq-túlikpen, balalarǵa arnalǵan kıim-keshekpen qamtylǵan.
«Kópbalasy bar bir otbasynyń jaǵdaıy týraly aıtaıyn. Balalardyń ákesi densaýlyq jaǵdaıyna baılanysty jumyssyz qalǵan. Onyń 16 jasar qyzynyń múgedektigi bar. Jaldap turǵan páterine tóleıtin qarjysy bolmady. Sol sebepten, birneshe aı boıy oǵan páter aqysyn tóleýge kómek berildi. Mektep jasyndaǵy 3 balasy ata-anasynyń ótinishi negizinde Besikti mektep-ınternatyna ornalastyryldy», - dedi ol.
Al, 2 jasóspirim balasy bar áıeldiń turǵylyqty baspanasy bolmaǵan. Sondyqtan, turaqty jumys taýyp, jaǵdaıy rettelgenshe turmystyq zorlyq-zombylyqqa ushyraǵan áıelderge kómek kórsetý bólimshesine ýaqytsha ornalastyrylǵan.
«Komıssııada ata-anasynyń tárbıesine kónbeıtin 15 jasar jasóspirimniń máselesi qaraldy. Jasóspirim qańǵybastyqqa salynyp, sabaqtan jıi qalady. Polıtsııa qyzmetkerleriniń usynysymen ony Aqtaý qalasyndaǵy devıantty minez-qulyqty balalarǵa arnalǵan mektep-ınternatqa ornalastyrý máselesi týyndady. Alaıda, komıssııanyń talqysynan keıin jasóspirimge taǵy bir múmkindik berýge uıǵarym jasaldy. Sóıtip, komıssııanyń uıǵarýymen jasóspirimge «Shans» kámeletke tolmaǵandardy psıhologııalyq-áleýmettik qoldaý ortalyǵynda psıhologııalyq keńes berý, sporttyq úıirmelerge qatystyrý, polıtsııanyń únemi baqylaýyna alý máselesi sheshimin tapty. Qazir jasóspirimniń tártibi jaqsaryp, sabaqtan qalmaıtyn boldy. Sportpen shuǵyldanyp júr», - dep málim etti Nurjan Ermuhanov.
