Atyraýda qaldyqty ruqsatsyz jınaǵan seriktestikke 37,4 mlrd teńge aıyppul salynǵan

ATYRAÝ. KAZINFORM – Atyraý soty 2023 jyly qaldyqty ruqsatsyz jınaǵan «Oxygenator» JShS-ǵa 37,4 mlrd teńge aıyppul salýǵa qaýly shyǵarǵanymen, aıyppul áli óndirilmegen. 

Atyraý oblystyq ekologııa departamentiniń baspasóz qyzmetinen málim etkendeı, byltyr «Oxygenator» JShS-ne qatysty Qazaqstan Respýblıkasynyń ekologııalyq zańnamanyń saqtalýy boıynsha jospardan tys tekserý júrgizilgen.

– Tekserý kezinde «Oxygenator» JShS-nyń qaldyqtardy ruqsatsyz jınaqtap, ekologııaǵa áser etý ruqsatyn almaǵany anyqtaldy. Seriktestikke qorshaǵan ortaǵa áser etý ruqsatyn almaı, qaldyqtardy jınaqtaǵany úshin ákimshilik quqyq buzýshylyq týraly hattama toltyryldy. Hattamamen kelispeı, sot qaraýyna joldaý týraly ótinish berildi. Atyraý qalasynyń ákimshilik quqyq buzýshylyqtar jónindegi mamandandyrylǵan sotynyń 2023 jylǵy 1 qarashadaǵy qaýlysymen «Oxygenator» JShS-ǵa 37 mlrd 495 mln 296 myń teńge kóleminde ákimshilik aıyppul salyndy, - dep habarlady departamenttiń baspasóz qyzmeti.

Biraq «Oxygenator» JShS-niń basyshlary sottyń aıyppul salý týraly qaýlysymen kelispegen. Sóıtip, Atyraý oblystyq sotyna apellıatsııalyq shaǵym túsirgen. 

– Atyraý oblystyq sotynyń 2023 jylǵy 29 qarashadaǵy qaýlysymen «Oxygenator» JShS-niń apellıatsııalyq shaǵymy qanaǵattandyrýsyz qaldyryldy. Al, Atyraý oblysynyń mamandandyrylǵan aýdanaralyq ekonomıkalyq sotyna áser etý ruqsatynsyz qaldyqtardy jınaqtaýǵa tyıym salý úshin talap aryz joldandy. Atalǵan sottyń 2024 jylǵy 22 qańtardaǵy sheshimimen talap aryz qanaǵattandyrylyp, atqarý paraǵy sot oryndaýshylarǵa joldanǵan edi, - dep málim etti departamenttiń baspasóz qyzmeti.

Departamenttiń málimetinshe, aıyppul áli óndirilmegen. Seriktestiktiń jumysy ruqsat alǵanǵa deıin toqtatylǵan. Qaldyqty jınaýǵa ruqsat alsa, jumysyn qaıta jalǵastyrýy múmkin. 

Eske sala ketelik, buǵan deıin Atyraý oblysyndaǵy «Morskoe» ken ornynda munaı aralasqan suıyqtyq tógilgenin jazǵan edik.